Таңһчин делгрлтд туслх төсвс

Сегодня, 12:30 | Общество, Таңһчин зәңгс, Зіњг

Цергә шишлң керг-үүлдврин ветеранмуд орн-нутгин болн регионмудын олна бәәдл-җирһлд шунмһа кевәр орлцад, йосна бүрдәцсин үүлдврт орлцх зөвтә гиҗ Әрәсән Президентин заавр дигтә-даратаһар бәәдл-җирһлд тохрагдҗахнь лавта. Орн-нутгин дуһргудыг болн олна бүрдәцсиг эдн чадмгар һардҗана, залврин ханьд дааврта үүлд батлгдсн бәәнә.
Хальмг ик сурһульд «Баатрмуд-08» гидг төсвин «Региона болн муниципальн залвр. Баатрмуд-08» гидг немр сурһулин көтлвр җилин эргцд күцәгдв. СВО-н ветеранмуд тиим кевәр залврин халхар немр эрдм сурв. Ноха сарин 28-д тер көтлврин ашлгч девсң экләд, ветеранмуд төсвән харсв. Хальмг Таңһчин Улсин Хуралын (Парламентин) Ахлач Артем Михайлов, таңһчин Толһачин һардврин болн таңһчин залврин элчнр, Хальмг ик сурһулин багшнр шүүврин комиссин ханьд орлцв. Тер мет Әрәсән Президентин Академин ВШГУ-н регионмудын көтлврин һардач Надежда Кононенко болн эн бүрдәцин нүүрлгч мергҗлт Мария Синанова бас комиссин ханьд орсинь темдглхмн. Ашлгч шүүвр хойр өдрин эргцд болв.
Хальмг ик сурһулин көтлврт орлцсн ветеранмуд Хальмг Таңһчин социальн делгрлтин болн экономикин төрмүдәр 26 төсвән харсв. Тер тоод СВО-д орлцачнриг болн теднә өрк-бүлмүдиг дөңнлһнә, селәнә эдл-аху, зуульчллһ, баһчудын политик болн тооһин эв-арһс делгрүллһнә төрмүдәр ветеранмуд эврә төсвән белдҗ.
Хальмг Таңһчин Улсин Хуралын (Парламентин) Ахлач Артем Михайловин темдглсәр, залврин халхин эрдмәр сурлһна көтлврт орлцачнр болн Хальмг ик сурһулин багшнр ик кемҗәтә белдврин көдлмш күцәсн болна. Төсвсиг йирин бәәдл-җирһлд, тер тоод муниципальн бүрдәцсин үүлдврт күцәҗ болҗана
- Бидн таңһчин бүрдәцсин болн муниципалитетмүдин төлә мергҗлтнриг белдҗәнәвидн. Тәвсн күслдән күрхин төлә эв-арһан болн медрлән олзта-тустаһар ветеранмуд олзлна. Тиим кевәр эдн эзни хәләцтә чадмг һардачнр болҗ чадхан иткүлв, талдан әмтнлә сән хәрлцә тогталһна эв-арһиг чигн сәәнәр дасч авв. Тиим кевәр көтлврт тәвсн даалһвр бүклдән күцәгдв, - гиҗ РАНХИГС-ин Президентин Академин багш болн номт Надежда Кононенко эврә тоолвран келв.
Хальмг ик сурһулин һардачин дарук Конин Оксанан үгәр болхла, көтлврт орлцачнр эврә төсвән бәәдл-җирһлд тохрахар седҗәнә. СВО-д орлцачнриг сурһмҗллһна көдлмшт орлцуллһна тускар келгднә. Сурһульмудт цергә классмуд секлһнә төсв соньн болна. Таңһчин төлә цергә кадрмуд белдлһн бас ик чинр зүүҗәнә. Тиим классмуд бүрдәлһнд мана ик сурһуль дөңгән күргҗ чадҗана. Мана вузин ханьд цергә сурһулин төв үүлднә, терүнә дамшлтыг чигн шин классмудт олзлҗ болна.
Ноха сарин 29-д «Шаңһа болн муниципальн залвр» гидг көтлврәр немр эрдмәр сурсн «Баатрмуд-08» төсвд орлцачнрт иткл цаасн бәрүлҗ өггдв. Хальмг Таңһчин Улсин Хуралын (Парламентин) Ахлач Артем Михайлов, Әрәсән Президентин Академин номт Надежда Кононенко, таңһчин Толһачин һардврин ахлач Кирилл Попов, Хальмг ик сурһулин һардач Салан Бадм ветеранмудыг йөрәһәд, улм өөдән күцәмҗ дурдв.

Тоолвр:
Таңһчин делгрлтд туслх төсвс
Нахошкинә Мингиян, таңһчин социальн делгрлтин, күч-көлснә болн көдлмшәр тетклһнә министр: «Улсин эдл-ахун Әрәсән Академин болн Хальмг ик сурһулин багшнр өгсн медрл маднд кергтә болхнь маһд уга. Ода министрин көдлмшт тер медрлән олзлҗанав. Маднд немр эрдм эрк биш туста болхнь лавта.
Таңһчин делгрлтд туслх төсвс
Бухалдан Җаңһр: «СВО-н ветеранмудыг болн теднә өрк-бүлмүдиг дөңнхин төлә психологин, зөв-йосна халхар дөң күрглһнә төв бүрдәлһнә туск төсвән харслав. Ветеранмудыг олна бүрдәцсин көдлмшт орлцуллһна эв-арһ бәәнә, болв райодт болн селәдт тиим дамшлт тархах кергтә. Ирлцңгү төвд ветеранмуд харһад, үүмүлҗәдг төрмүдәр хувалцҗ, нег-негндән дөң-нөкд болх гиҗ бат ицгтә бәәнәв.
Энүнәс нань эврә билгән делгрүлҗ нань чигн эрдм дасч чадхмн. Эдниг артистнр болн нань чигн эрдмчнр белдҗ чадҗана. Мадниг «Баатрмуд-08» төсвд орлцулҗ, немр эрдм дасхсн таңһчин Толһач Хаска Батуд, таңһчин залврт бол ник сурһулин багшнрт ик ханлтан өргҗәнәв.
Таңһчин делгрлтд туслх төсвс
Александр Онежко: «Би олна спортын төрәр төсвән белдләв. Тиим спорт олн-әмтиг хамцулх зөвтә гиҗ санҗанав. Терүг би Приютна района дамшлт олзлҗ үзүлх санатав. Эн төсвд ик-бичкн уга орлцх. Спортын халхар кесг керг-үүлдвр күцәхвидн. Мана һазрт бәәдг келн-улсин авъяс бас олзлгдх. Эн төсвиг таңһчин талдан райодт чигн күцәҗ болҗана гиҗ санҗанав. Приютное селәнә олн салврта гимназьд 30 һар җилдән багшлҗанав, тегәд шин медрл көдлмшән улм сәәнәр күцәхд туслхнь маһд уга.

ТҮРВӘН Һуна

Видео