ЛНР-ин бичкдүдт белг илгәв

Сегодня, 12:48 | Общество, Таңһчин зәңгс, Зіњг

Сурһулин шин җил угтад, мана таңһчд «Бичкдүдиг сурһульд белдхд нөкд болтн» гидг буйнч седклин керг-үүлдвр давҗана. Җирһлин күнд таалд туссн өрк-бүлмүдт дөң-нөкд болад, бичкдүдиг хувц-хунрар, сурһульднь кергтә эд-таврар теткҗәнә.
Таңһчин әмтн җил болһн давулгддг керг-үүлдврин йовудт Луганск Улсин Республикин Антрацитовск района бичкдүдт килмҗән бас тусхаҗ, эдниг оньгасн адхш. Шидр таңһчин социальн делгрлтин, күч-көлснә болн көдлмшәр тетклһнә министерствин көдләчнр Антрацитовск района әмтнә социальн теткврин төвин хәләврт бәәдг 20 күүкн-көвүнд белг өгүлв. Сурһульднь кергтә олн зүсн эд-тавр сурһулян сәәнәр сурхд болн билг-эрдмән делгрүлхд туслхнь лавта.
- Олн үртә, баһ тетквртә өрк-бүлмүдт килмҗән тусхаһад, цаһан седклин белгән илгәһәд, сурһулин шин җиллә йөрәҗәнәвидн. Бичкдүдин сурсн тоотынь хулдҗ өгвидн. Сурһулян сәәнәр сурад, сән үрд болҗ өстхә, - гиҗ министр Нахошкинә Мингиян бичкдүдиг йөрәв.
ДООҖАН Наталья

Видео