Төрскән харсачнр Москвад цуглрв

Сегодня, 12:53 | Общество, Таңһчин зәңгс, Зіњг

Ноха сарин 27-28-д Москвад «Хамдан Диилвр делдхмн» нертә ик хург болв. Цергә шишлң керг-үүлдврин ветеранмуд, теднә өрк-бүлмүдин гешүд, Әрәсән Президентин һардврин, орн-нутгин Залврин, Федеральн Хүүвин, шаҗна элчнр, цергә седкүлчнр, шинҗләчнр болн арһлачнр терүнд орлцв. Ут тоодан ик хург хойр миңһн һар орлцачиг негдүлв. «Төрскән харсачнр» шаңһа саң, «Медрл» ниицән болн Москва балһсна Залвр эн хургин бүрдәһәчнр болв.
Әрәсән Президент Владимир Путин керг-үүлдвриг нүр үгәр секв.
– Мана орн-нутгт цергә шишлң керг-үүлдврин ветеранмудыг болн теднә өрк-бүлмүдиг дөңнхин төлә өргн көдлмш кегдҗәнә. Эн туст «Төрскән харсачнр» шаңһа саңгин, талдан бүрдәцсин, волонтермудын болн олн улсин ач-тусинь темдглх кергтә. Цергә даалһвран күцәһәд, хәрҗ ирсн Әрәсән баатрмудын төлә бәәцин сән таал тогтагдх зөвтә. Тер мет мана ветеранмуд экономикин, бизнесин, билг-эрдмин, тосхлтын, селәнә эдл-ахун болн талдан халхсар көдлҗ чадҗана. Терүнәс нань дорас өсч йовдг үйнрт төрскнч сурһмҗ өглһнә керг-үүлдврмүд бүрдәлһнд эдн бас эрк биш орлцх зөвтә. Социальн болн эрүл-менд бәәдл харлһна халхар эднд туслмҗс күргҗәнә. Цааранднь эн дөңгин кемҗән өсәд бәәхмн, – гиҗ Владимир Путин темдглсн болдг.
Әрәсән Залврин Ахлачин дарук Татьяна Голикова СВО-н ветеранмудыг дөңнлһнә эв-арһсин тускар дәкнәс тодлулв. Давсн ик хург ухан-тоолврарн хувалцлһна талвң болв. Владимир Владимировичин даалһсар мана харсачнр көдлмшәр теткгдх зөвтә. Тер мет ирлцңгү сурһулин болн эрдмин туст бас дөңнгдх болв. Орн-нутгин Залвр «Төрскән харсачнр» саңла хамцу үүлдвр күцәҗәнә гиҗ цәәлһв.
Хойр өдрин туршарт ик хургт орлцачнр олн зүсн төрмүд хаһлв. Сурһуль-эрдмин талвңд йосн биш ухана эв-арһиг олзллһна тускар күүндвр болв. Тер мет орн-нутгин бизнесин нүүрлгч бүрдәцин һардачнрла харһлтс бас давулгдв.
Ут тоодан тенд хөрн һар талвң көдлв. Тер дотр «Катэрвил» бүрдәц цергә шишлң керг-үүлдврин йовудт шавтсн улст шишлң сандлмуд болн талдан тоот үзүлв.
Москвад болсн ик хургт Хальмг Таңһчин элчнр цергә шишлң керг-үүлдврин ветеранмуд Һәрән Бадм болн Роман Бризгалов (зургт) бас орлцснь темдгтә болв.
Һәрән Бадм 1974 җилд Яшкулин района Улан Эрг селәнд һарсмн. Тенд дунд сурһулян төгсәснә хөөн цергт мордв. Меҗә харлһна теңгсин әңгүдт церглҗ йовла. Дарунь милицд көдләд, Санкт-Петербург балһсна МВД-н ик сурһуль төгсәсн болдг. 1996 җиләс авн Ик Буурл селәнд түүмр унтралһна әңгд көдлҗәнә. Цергә шишлң керг-үүлдвр эклхлә, Бадм эврә дурар тиигәрән одхар шиидв. 2023 җилин мөчн сарас авн «Төрскән харсачнр» саңгин Хальмг әңгин көдләчнрин хәләврт бәәнә. Өдгә цагт таңһчин түүмр унтралһна 12-ч әңгиг һардҗана. «Ик хургт орлцхар Әрәсән регионмудас олн ветеранмуд ирв. Эдн цугтан цергә халхар ик дамшлтта улс болна. Эндр бидн орн-нутгин, төрскн һазрин делгрлтд ач-тусан күргәд, седклән тәвҗ көдлхәр зүткчәнәвидн», – гиҗ Һәрән Бадм ухан-тоолврарн хувалцв.
Цергә шишлң керг-үүлдврин нег һазра ветеран Роман Бризгалов болхла 2022 җилд Төрскән харсхар йовв. Севастополь балһснд белдвр авад, дарунь 102-ч тойгта полкин негдгч батальона ханьд церглсмн. 2023 җилин чилгчәр Артемовскин зөрүллтд дәәлдәд, күндәр шавтв. Залу-зөрмгин II девсңгин болн Суворовин медальмүдәр эн ачлгдсн билә. Урднь Роман эврә кергән бүрдәһәд арһлачар көдлҗәлә. Өдгә цагт эн эрмдгтә улсин дунд давулгддг спортын марһаст шунмһаһар орлцна.
«Төрскән харсачнр» саңгин дөң-нөкдәр Роман Бризгаловин герт ирлцңгү кец-таал тогтагдв. Тер мет шишлң хувцн болн спортын кергсл энүнд йилһҗ өггдв. Энүнә келсәр, ик хургин йовудт цергә үүрмүдтәһән харһад, соньн керг-үүлдврмүдт орлцсндан байрлв. «Төрскән харсачнр» саңгин элчнрт болн хургиг бүрдәсн цуг улст ханлтан күргҗәхән медүлв.
Немхәс, Хальмг Таңһчд өсч-боссн цергә шишлң керг-үүлдврин ветеран Очра Алтн Москван ик хургт бас орлцв. Өдгә цагт эн тенд көдләд, хотл балһсиг элчлв.
Тиим ик хургт нег һазра мана баатрмуд орлцснь мадна төлә ик бахмҗ үүдәснь лавта.

КАРСАНА Евгения

Видео