Медрлин Өдрлә йөрәв

Сегодня, 14:00 | Общество, Таңһчин зәңгс, Хальмг Тањєчин Толєачин ґдр-бўр, Зіњг, Сурєуль-эрдм


Элст балһсна 4-ч тойгта дунд сурһульд 1046 сурһульч сурна, тер тоод 100 күүкн-көвүн эн җил 1-ч класст орв. Дамшлтта багшнр Карун Светлана, Савкан Саглр болн Чурюма Светлана эдниг бүләнәр тосч авв. Медрлин Өдрлә йөрәхәр эн сурһульд Хальмг Таңһчин Толһач Хаска Бату, таңһчин прокурор Виталий Семенченко, Элст балһсна Хургин депутат Сарңга Церн болн нань чигн улс ирснь темдгтә болв.
- 1-ч класст орҗадг сурһульчнр ке-сәәхн хувцан өмсәд, эндр ик байрта бәәнә. Эн өдрәс авн тана җирһл улм соньн болх, өдр болһн шин медрл хоршаҗ, хоорндан таньлдҗ, билг-эрдмән делгрүлҗ чадхит. Тана эк-эцкнрин төлә чигн ончта, байрта өдр болҗана, 11-ч класст сурчадг күүкд-көвүд үүмәтә бәәнә. Тадн тааста эрдмән шүүҗ авад, шаңһа шүүврән өгәд, цааранднь сурхит. Җирһлин хаалһд юн эс учрна, тер бийнь уралан зөрҗ, күслдән күрч, сансн санантн күцх болтха! Мана эңкр багшнриг бас сән Өдрлә йөрәҗәнәв. Таңһчин һардвр багшин чинр өөдлүлхин төлә ирлцңгү керг-үүлдврмүд күцәҗәнә. Әрәсән Президент Владимир Путинә дөңгәр мана таңһчин сурһульмудт бат ясвр кегдҗ, сән таал тогтагдҗана. Ода мана таңһчин сурһуль-эрдмин бүрдәцсин ик зунь ясгдв. Мана таңһч җил ирвәс делгрәд-батрад йовна. Тадн болхла иргчдән таңһчан залх улс болҗанат, - гиҗ Хаска Бату сурһульчнриг йөрәв.
Эн җил дунд сурһульд түрүн прокурорск класст сурсн күүкд-көвүд сурһулян төгсәв. Эн җил болхла эрүл-менд харлһна халхар шишлң класс секгдҗәнә. Хальмг Таңһчин прокурор Виталий Семенченко бас арвтнриг йөрәһәд, шишлң класс секлһнә керг дөңнсн таңһчин сурһуль-эрдмин болн номин министерствд, Хальмг ик сурһульд болн дунд сурһулин багшнрт ханлтан өргв.
Дунд сурһулин һардач Очр-Һәрән Елена сурһульчнрт болн багшнрт бас бүлән үгмүдән нерәдв. Әрәсән улсин ниицлтин җил болҗахас иштә 1-ч классин сурһульчнр эк-эцкнртәһән хамдан «Ниицлтин моднд» олн зүсн өңгтә тасм өлгҗ кеерүлв. Сән авъяст тохрсар, КТК-Р җил болһн 1-ч классин сурһульчнрт ке-сәәхн дорвас белглнә.
Түрүн хоңх җиңнүлсн 1-ч класст орҗадг Хаптхан Мария болн 11-ч классин сурһульч Рустамов Марат сурһулин шин җил эклҗәхиг зарлв.
ДООҖАН Наталья

Видео