Олн һазрас ирсн элчнр сурчана

Сегодня, 12:46 | Общество, Таңһчин зәңгс, Зіњг

Хальмг ик сурһулин һардач Салан Бадм, терүнә дарук Кована Екатерина, оютнрин шин селгә орулҗ авлһна комиссин дааврта сегләтр Баатрин Владимир, эмнлһнә дацңгин һардач Бадмин Саглр седкүлчнрлә харһв. Эдн абитуриентнриг орулҗ авлһна, эмнлһнә дацңгин үүлдврин болн Әрәсән Президентин мөрә авсн оютнрин тускар келҗ өгв.
Эн җил абитуриентнр дунд юристин, шаңһа болн муниципальн залврин, тосхачин, тууҗин, багшин эрдмәр болн эмнлһнә дацңд хамгин ик марһан болв. Ут турштан 10 миңһн күн Хальмг ик сурһульд эрлһән орулв. Эн җил ик сурһульд архитектурин болн дизайна, социальн салврт күцәдг дамшлтын психологийин болн нань чигн эрдмәр түрүн болҗ абитуриентнриг орулҗ авв. Тер мет көдәрсн һазриг шинәс босхлһна төрәр магистратурт сурч болхмн.
Эмнлһнә дацңд абитуриентнриг орулҗ авлһна керг яһҗ давсна болн терүнә лабораторьмудыг шин кергсләр тетклһнә тускар чигн күүндвр болв. Эн җил Хальмг Таңһчин залврин даалһврар 150 күн оютнрин тоод орв, терүнәснь 75 күн эмнлһнә кергәр болн 75 күн бичкдүдин эмчин әңгд сурхмн. Мөңгән өгәд, бооца батлсн улс бас оютнр болв.
Росздравнадзор эмнлһнә дацңгин үүлдвр шинҗлҗ бүртклһнә керг-үүлдвр күцәв, терүнә ашар эмчнриг белдлһнә көдлмшиг цааранднь күцәх зөв өггдснь темдгтә. Сурһулин чинриг өөдлүлхин төлә талдан вузмудас профессормуд ирҗ лекцс умшна. Энткг орн-нутгин оютнрин төлә багшнр англь келәр эс гиҗ орчулачин дөңгәр лекцс умшна, дамшлтын кичәл давулна. Оютнр таңһчин эмнлһнә улд дамшлт хоршана. Хальмг ик сурһулин һардвр иргчдән эврә эмнлһ секхәр зуралҗана. Дацңгин лабораторьмудыг шин кергсләр тетклһнд 72 сай арслң һарһгдв. 2026 җилин хаврар Хальмг ик сурһуль нарт-делкән эрүл-менд харлһна бүрдәцин вузмудын тоод орв. Африкин элчнр болн Бангладеш орн-нутгин баһчуд Хальмг ик сурһульд эмчин эрдм бас дасхар седҗәнә, тиим кевәр эн дацңд һазадын орна оютнрин то өсәд йовхнь лавта.
Тер мет урднь келсәр, 2026-2027 сурһулин җилин эргцд Хальмг ик сурһулин 46 оютн Әрәсән Президентин болн орн-нутгин залврин Ахлачин стипендь авхмн. Эдн йилһән сәәнәр сурад, номин көдлмш күцәҗәнә. Өөдән мөрәсәр ачлгдсн кесг дацңгин оютнр эврә номин болн олна үүлдврин тускар тодрхаһар келҗ өгв.
ТҮРВӘН Һуна

Видео