Яшкулин районд одв

Сегодня, 12:49 | Общество, Таңһчин зәңгс, Зіњг

Хальмг Таңһчин залврин Ахлачин дарук Өлзәтин Марина һаха сарин 1-д Яшкулин районд керг-төрин халхар одв. Эн өдр дааврта һардач Улан Эрг селәнә дунд сурһульд, әмтиг көдлмшәр тетклһнә төвд болн района эмнлһнд одад, паркд сән кец-таал тогталһна көдлмшин йовудыг хәләв.
Улан Эрг селәнә сурһуль ирх җилд 150 җилин өөнән темдглхмн, 2022 җилд энд бат ясвр кегдсмн. Таңһчин залврин Ахлачин дарук байрин хургт орлцад, сурһульчнриг болн багшнриг медрлин Өдрлә йөрәв. Сурһулин байн тууҗиг хадһлад, сурһульчнрин билг-эрдминь болн күцәмҗинь олнд медүлтн гиҗ Марина Петровна дурдв.
Дарунь Өлзәтин Марина Яшкуль селәнд одад, әмтиг көдлмшәр тетклһнә төвд бат ясвр яһҗ кегдсинь хәләв. Социальн бүрдәцин көдләчнр шин бүүртән орхар белдҗәнә, удл уга эднд шин өлг-эд, кергсл авч ирхмн.
Яшкулин района эмнлһн 1976 җилд тосхгдсн бәәрнд бәәршлнә. «Негдсн Әрәсә» партин орлцлһтаһар энд ирх җилд бат ясвр кегдхмн гиҗ зуралгдҗана. Ут тоодан ясврин көдлмшт 300 сай арслң һарһгдхмн. Ясврин көдлмш 2028 җилд төгсх зөвтә. Эмнлһнә бүрдәц шинрүлгдснә хөөн района 15 миңһн күүнә төлә сән кец-таал тогтагдҗ, өөдән чинртә дөң күрггдхмн.
ДАВАН Наталья

Видео