Әәмшгтә йовдлмудыг гетлхин төлә

Сегодня, 12:53 | Общество, Таңһчин зәңгс, Зіњг

Шидр Элстд терроризмиг бурушалһна керг-үүлдврмүд болв. Хотл балһсна 8-ч, 10-ч, 2-ч, 18-ч,19-ч тойгта сурһульмудт санлын керг-үүлдврин йовудт хөрн шаху җил хооран Бесланд медрлин Өдрлә әмнәсн хаһцсн сурһульчнрин санл тевчв. Сурһульчнр, «Движение Первых» җисәнә элчнр, келн-улсин ниицәсин гешүд санлын керг-үүлдврт орлцад, Донбассин һазрт болҗадг цергә керг-үүлдврин орлцачнрт буйнч седклин дөңгән цуглулв.
Хальмг ик сурһульд оютнрин болн зөв-йосна бүрдәцсин элчнрин хург болв. Түрүләд хургт орлцачнр Бесланд болн Крокус Сити Холлд болн нань чигн һазрт болсн әәмшгтә йовдлмудын ашт әмнәсн хаһцсн улсин санлынь тевчв.
Хальмг Таңһчин Толһачин селвгч, терроризмәс хөрлһнә таңһчин комиссин һардач Яшкула Зурһан тоолврарн хувалцҗ, әәмшгтә йовдлмудыг гетлдг шишлң цергллтсин болн зөв-йосна бүрдәцсин көдләчнрин күцәмҗтә көдлмшинь онц темдглв.
Беслан балһснд ирлцңгү йовдл һарһсн улсиг уга келһнә кергт Әрәсән мөшклһнә комитетин Хальмг Таңһчар үүлддг заллтын һардачин дарук, юстицин полковник Игорь Соболь орлцсмн, тегәд эн туст яһҗ үүлдснә тускар Игорь Александрович тодрхаһар келҗ өгв.
Бас мөшклһнә комитетин таңһчин заллтын һардачин ах нөкд Тамара Эльдеева үг авч, әәмшг учрсн кемд яһҗ бийән бәрхин тускар баһчудт тодрха цәәлһвр өгв. Тер мет таңһчин МВД-н экстремизмлә ноолдлһна төвин мергҗлт Бован Людмила оютнрла кесг кичәл давулҗ, баһчудыг эврә хорта кергт орлцулхар седлһиг ууруллһна кесг эв-арһсин тускар тодрхаһар келҗ өгнә. Төвин көдләчнр иим кичәлмүд дару-дарунь бүрдәнә гиҗ МВД-н элч келв.
Дагестана сойлын төвин һардач Аслудин Калабегов болхла, мана бәәдл-җирһлд харшлтан күргхәр седҗәдг улсин үүлдвриг бурушаҗ, кен-негән күндлҗ, хоорндан ниитә бәәлһиг батрулх кергтә гиҗ заав.
Тер өдрин асхар Элстд Диилврин паркд дәәч-интернационалистин бумбд кесг бүрдәцсин элчнр цецгүд тәвв. Тер мет Баатрмудын аллейд, Элстин гиичлүрин талвңд бас кесг керг-үүлдврмүд болв.
ТҮРВӘН Һуна

Видео