Келн-улсин бичлтин чинр өөдлүләд

Сегодня, 13:05 | Общество, Таңһчин зәңгс, Зіњг

Эндр бидн келн-улсин бичлтин Өдр темдглҗәнәвидн. Өөрднрин лам болн гегәрлт Зая-Пандита хальмг улсин ик зөөр болгч тод бичг үүдәсн болдг. Мана таңһчд хальмг кел сурһулин бүрдәц болһнд, келн-улсин бичкдүдин садмудт дасна, Төв хурлд җил болһн хальмг кел даслһна кичәлмүд давулгдна. Баһчудын төлә хуучн бичлт соньн болҗ, эдн тод бичг олзлҗ бичхәр шунна. Эн сән Өдрлә ирлцҗ «Заясн бичг» гидг һәәхүл давуллһн сән авъят тохрад, нарт-делкән чинртә болв.
Эн җиләс авн болхла Әрәсән Президент Владимир Путинә зәрлгәс иштә һаха сарин 8-д орн-нутгин улсин келнә Өдр темдглхвидн. Эн йовдлмудт нерәдәд Элстд һаха сарин 5-д өөрд-моңһлын бичлтин «Заясн бичг» гидг нарт-делкән һәәхүл секгдхмн. Хальмг Таңһчин сойлын болн зуульчллһна министр, Әрәсән улсин Ассамблейин таңһчд үүлддг әңгин ахлач Бембин Евгений, Н.Пальмовин нертә Келн-улсин музейин һардач Мучан Ирина болн таңһчд корей улсин ниицәнә ахлач Улана Наталья эн һәәхүлин тускар келҗ өгв.
- Бурятяс, Моңһлас, Китдин Дорд Моңһлас гиичнр ирхиг күләҗәнәвидн.Һәәхүлд келн-улсин эрдмчнрин 40 һар көдлмш үзүлгдхмн. Һәәхүл Келн-улсин музейд һаха сарин 5-д 15 часла секгдхмн. Сүл җилмүдт баһчуд тод үзгәр соньмсдг болснь байрта, балсһна гермүдин эрсмүдиг тод бичг олзлҗ бичгдсн зургуд кеерүлнә. Баһчуд хальмг келән дасхар Санҗин Николайин нертә сойлын делгрлтин төвин улд тод бичг болн «Җаңһр» дуулвр даслһна кичәлмүдт орлцна. Цуг эн тоот баһчуд төрскн келән дасхд туслна, - гиҗ Бембин Евгений келв.
Мучан Иринан темдглсәр, «Заясн бичг» гидг һәәхүл таңһчин улсиг бәәтхә, олн гиичнриг соньмсулна. Эн һәәхүл хойр сардан көдлх, тегәд олн-әмтн терүг хәләҗ чадхмн. Эн җил музей 105 җилин өөнән темдглв, тегәд хулһн сард Цугәрәсән хург болхмн гиҗ зуралгдҗана, терүнд орн-нутгин кесг регионмудын музеймүдин мергҗлтнр, гиичнр ирхмн. Элстд болн Кызылд болсн шаҗна ик хургин йовудт Тыван, Бурятин, Хакасин Келн-улсин музеймүдлә бат залһлдан батлгдв. Эн җил Н.Пальмовин нертә музей Әрәсән тавн мүҗд болн Казахстанд одад, нүүдл улсин һәәхүл бүрдәснь темдгтә. Удл уга Чечняд, җилин чилгчәр болхла Рязань балһснд бас зурачнрин һәәхүл бүрдәгдхмн гиҗ Ирина Ивановна зәңглв.
Мана таңһчд бәәдг олн келн-улсин ниицәсин элчнр Әрәсән улсин ниицлтин җилд нерәдгдсн керг-үүлдврмүдт шунмһаһар орлцҗана. Корей улсин әңгин элчнр баһчудын төлә төрскн келән даслһна туст бас олн зүсн керг-үүлдвр давулна. Хальмг ик сурһульд оютнр эн кел дасчахнь темдгтә, һәәхүлд эрк биш орлцхан чигн Улана Наталья иткүлв.

ДООҖАН Наталья

Видео