Тааста кергнь сергмҗтә болна

Сегодня, 12:43 | Общество, Таңһчин зәңгс, Зіњг

Өдр-бүрин, герин көдлмшин йовудт үүрмүдтәһән харһад, ю-бис күүндәд, цаган сергҗмтәһәр давулдг арһ нам учрхш гиҗ кесгнь зовлңшна. Болв шулун-шудрмг, даңгин серглң-дерглң бәәдг улс көдлмшән седклән тәвҗ күцәсн деерән сул цаган чигн олзта-тустаһар давулҗ чадна. П.Жемчуевин нертә таңһчин эмнлһнд көдлдг Татьяна Брежнева көдлмштән һавшун, дааврта мергҗлт болад үүрмүдтән үлгүр-үзмҗ болдгнь мел үнн.

Татьяна Николаевна таңһчин эрүл-менд харлһна халхд олн җилдән үнн-чик седклтәһәр көдлсн төләдән «Әрәсән эрүл-менд харлһна йилһән сән көдләч» гидг өөдән нер зүүнә. Т.Хахлынован нертә медицинск училищ төгсәснә хөөн эн хальдврта гемәс хөрлһнә эмнлһнд күч-көлснә хаалһан эклсмн. Тенд Манҗин Светланан һардврт дамшлт хоршасн болдг. Светлана Апанасовна цугинь зааһад, дөң-нөкд болв гиҗ Татьяна Николаевна ханмҗтаһар тодлна. 1998 җилд эн П.Жемчуевин нертә таңһчин эмнлһнд ирәд, 2021 җиләс авн болхла бачм әңгин ах медицинск эгчәр көдлҗәнә. Эн әңг таңһчин талдан эмнлһнә бүрдәцслә бат залһлда бәрҗ, ямр нег мергҗлтин дөң керглгдхлә теднлә үгцәд, олн зүсн төрәр бәрмт цаасд илгәҗ, лабораторин шинҗллтс йовулна. Татьяна Николаевна ик дааврта, кергән сәәнәр меддг төләдән цуг даалһврмудыг дарунь күцәнә.
Әәмшгтә гем түгәд, госпиталь секх кергтә болхла, Татьяна Брежнева эн кергт бас орлцв. Троицкое болн Яшкуль селәдт таңһчин эмнлһнә госпитальмуд секгдәд, әмтнд дөң-нөкд күргҗәсмн. Татьяна Николаевнан келсәр, энүнә наһц эгчнь Валентина Пшеничко таңһчин эмнлһнд бас олн җилдән көдлсмн. Валентина Петровна бачм әңг бүрдәсн, түрүн һардачнь бәәсмн. Ода терүнә кергиг зе күүкнь чадмг кевәр делгрүлҗәнә. Келхд, Татьяна Николаевнан дү күүкнь болн күүкнь чигн эрүл-менд харлһна халхар көдлҗәхинь бас темдглхмн.
Татьяна Брежнева таңһчин эмнлһнә профсоюзин бүрдәцин гешүн болад, олна керг-үүлдвр бүрдәлһнд шунмһа кевәр орлцна. Олн җилдән эмнлһнд көдлҗәдг үүрмүдән өөнләнь йөрәҗ, күүкднь сурһульд орхла дем күргҗ, байр-зовлңган хувалцҗ эдн ниитә бәәнә.
Сул цаг учрхла Татьяна Николаевна үүл бәрәд, цаган сергмҗтәһәр давулна. Эн үүрмг сувсар ке-сәәхн хатхмр хатхна, зургуд зурна, наадһас цуглулна, олн зүсн цецгүд урһана. Валентина күүкнь бас һартан өөтә, тегәд эдн хамдан олн зүсн кегдлмүд кеҗ һарһна. Ке-сәәхн зургуд эн хамдан көдлҗәдг үүрмүдтән белглнә. «Көдлмшин хөөн үүл бәрәд седкл санамр бәәхлә, йосндан амрнач. Би бичкнәсн авн зургуд зурҗалав. Ода Москвад бәәдг Амелия ач күүкм зурачин сурһульд сурчана, Ева зе күүкм болхла намаг дахад бас үүл бәрнә. Намаг наадһас цуглулдгиг меддг улс зуульчлсн цагтан белг уга ирхш», - гиҗ Татьяна Николаевна келнә.
ДООҖАН Наталья

Видео