Багш болх седклтә оютнр

Сегодня, 13:33 | Общество, Таңһчин зәңгс, Зіњг

Шидр таңһчин сурһуль-эрдмин болн номин министр Александр Ким Хальмг ик сурһулин багшин сурһуль-эрдмин болн биологийин дацңгин оютнрла харһв. Педагогикин тиңкмин һардач, профессор Дякин Раиса харһлтыг һардҗ давулв.
Дацңгин декан Очра Ирина харһлтыг нүр үгәр секәд, эн җил багшин эрдм дасхар 100 һар күн Донецк Улсин Республикәс болн орн-нутгин кесг регионас ирсинь темдглв. Эн харһлтд магистратурт сурчадг 7 күн орлцв, баһчудыг багшин эрдм соньмсулҗана, тернь мадниг икәр байрлулҗана, гиҗ Ирина Николаевна келв.
Цааранднь министр Александр Ким эн дацңд сурчадг оютнр таңһчин сурһулин бүрдәцст ирҗ көдлх гиҗ нәәлҗәхән медүлв. Хальмг ик сурһульла мана нөкцлт өргҗәд йовна. Эндр бидн шинкн оютнр болсн баһчудла харһҗанавидн, терүнә өмн болхла тосхлтын багмудын гешүдлә күүндләвидн, гиҗ министр темдглв.
Александр Аркадьевич таңһчин сурһульмудт көдлҗәдг баһ наста багшнриг, классин һардачнриг дөнңлһнә керг-үүлдврмүдин тускар бас цәәлһвр өгв. Земск багшин җисән таңһчд делгрҗәнә. Эн җил бас кесг багшнр райодын болн селәдин сурһульмудт көдлхәр ирв. Шаңһас эднд 1 сай арслңга дем өгнә. Келхд, Ик Буурла района һардвр тер мөңгн деер 1 сай арслң немдгнь бахмҗта.
Хальмг ик сурһулиг төгсәснә хөөн альд көдлсән, ямаран дамшлт хоршасан бас министр келв. Кесг җилдән Элстин 3-ч тойгта сурһулиг һардҗ йовла, терүнә хөөн энүнд министрин үүл даалһсмн. «Хальмг ик сурһулин багшин дацңла бидн цааранднь чигн нөкцлтән өргҗүләд бәәхвидн. Мана нүүрлгч багшнр, «Җилин багш» марһана дииләчнр бас дамшлтарн хувалцх», - гиҗ Александр Аркадьевич келв.
Сочи балһсна шидрт бәәдг «Сириус» сурһуль-эрдмин төвд олзлҗадг эв-арһсин тускар профессор Панькинә Аркадий келҗ өгв. Ода иргч эрдмән бичкдүдин садас, эклц классас авн шүүҗ авлһна туст неквр тәвгдҗәнә. Нег үлү ах классмудт сурһульчнр эрдмән шүүҗ авх зөвтә, терүнә төлә жилд хойр дәкҗ намрар болн хаврар шинҗллтин көдлмш күцәгдх болна.
Харһлтын чилгчәр оютнр министрт олн зүсн төрмүдәр сурвран өгв, тиигәд түрүн харһлт бат нөкцлтин эклцнь болв гиҗ сангдна.
ТҮРВӘН Һуна

Видео