Төрскн келнә багшнр марһлдв

Сегодня, 11:18 | Общество, Таңһчин зәңгс, Зіњг, Сурєуль-эрдм

Липецк балһснд һаха сарин 7-ас авн 11 күртл «Төрскн келнә болн утх - зокъялын сән гисн багш» гидг Цугәрәсән марһан болв. Эн җил марһанд Әрәсән 87 регионас 131 багш болн бичкдүдин садмудын сурһмҗлачнр орлцв.
Лаганя 3-ч тойгта сурһулин хальмг келнә болн утх-зокъялын багш Павла Елена болн Элстин келн-улсин 16-ч тойгта бичкдүдин садын сурһмҗлач Фазылова Саглр Хальмг Таңһчиг элчлв.
Эн җил Хальмг Таңһчин билгтә, медрлтә мергҗлтнр Цугәрәсән жюрин ханьд бас орв. Таңһчин сурһуль-эрдмин болн номин министерствин әңгин һардач Увшин Зоя болн Элстин 20-ч тойгта «Нарн» гидг садын немр сурһулин багш Настан Виктория марһанд орлцачнрин мергҗлтинь шинҗлв.
Хальмг келнә болн утх-зокъялын багш Павла Елена 15 дииләчнрин тоод орв.
Цугәрәсән марһана ашлгч өдр болсн байрин хургт орлцачнриг Әрәсән гегән-герлин министр Сергей Кравцов йөрәснь темдгтә болв. Тавн җилин эргцд орлцачнрин то өсәд йовна. Эн җил 131 багш болн сурһмҗлач 47 келн яһҗ делгрҗәхинь үзүлв. Эн җил түрүн болҗ нагайбакск болн кумыкск келнә зөөр олнд медүлгдв гиҗ министр темдглв.
Әрәсән сурһульмудт дасчадг келнә то бас өсәд йовна. Сүл һурвн җилин эргцд шаңһа 38 көтлвр һарһгдв. Келнә туст шаңһа политикин зура батлгдв. Әрәсән республикүдин шаңһа келнә даслурт хамцу неквр тәвгдҗәнә. Тер мет төрскн кел даслһна туст методикин шин эв-арһс күцәгдх болв, тиим кевәр орн-нутг цуг келн-улсин келнә делгрлтиг дөңнҗәнә, зуг түүнә ул-сүүрнь орс келн болҗана.
Марһана ашар Карелия Республикин элч Глеб Фомин дииләчнь болв. Вепск кел дасхлһна тускар эн тодрхаһар келҗ өгв. Садмудын сурһмҗлачнр дунд Башкортостан Республикин элч Альбина Шарипова түрүн орм эзлв.
Төрскн келнә болн утх-зокъялын багшнр дунд Татарстанас Резида Курамшина хойрдгч ормд һарв. Якутин багш Очра Надежда һурвдгчнь болв. Сурһмҗлачнр дундас Санкт-Петербургас ирсн Екатерина Смирнова (2-ч орм) болн Татарстана элч Алсу Галиева (3-ч орм) йилһрв.
ТҮРВӘН Һуна

Видео