Заң-бәрцинь батрулсн марһан

10-10-2026, 10:56 | Общество, Таңһчин зәңгс, Зіњг

Хулһн сарин 2-т Элстин 2-ч тойгта дунд сурһульд «Багшин дебют» гидг таңһчин марһан болв. Эн җил 11 баһ наста багш марһанд орлцв. Элстин болн 9 района элчнр энд дамшлтан болн хоршасн эв-арһан сөрв. Эдн хальмг келнә болн нань чигн кесг кичәлмүд өгв. Эклц классин багшнр чигн эдн дунд бәәв.
Тер тоод Элст балһсна техникин лицейин эсвин багш Түрвән Церн, Городовиковск района Кировский селәнә лицейин информатикин багш Анастасия Беловодченко, Көтчнрә района Сарпа селәнә дунд сурһулин эклц классин багш Кирән Мария, Октябрьск района Хошуд селәнә дунд сурһулин тууҗин багш Бадыша Олег түрүн болҗ тиим марһанд орлцҗасн бийнь үүрмүдиннь дөңнлтәр урмд авч дассн юман олнд үзүлҗ нүүрт һархар шунв.
Тер мет эднлә хамдан дөрлдҗәсн Приютна района Песчаный селәнә дунд сурһулин эклц классин багш Виктория Безродная, Сарпан района Садовое селәнә 2-ч тойгта сурһулин төрскн (хальмг) келнә болн утх-зокъялын багш Юлия Круглова, Целинн района Хар Булг селәнә дунд сурһулин эклц классин багш Мушан Александра үүрмүдин селвгәр һардвр кеһәд нүүрлгч орм эзлхәр седҗәлә.
Цааранднь болхла Үстин района Үст селәнә дунд сурһулин физическ сойлын багш Ангрикә Александр, Яшалта селәнә дунд сурһулин эклц классин багш Дарья Неговора, Яшкуль селәнә гвардин майор С. В. Санчировин нертә дунд сурһулин тууҗин болн обществознаня багш Мадина Магомедова бас таңһчин марһанд йилһрхәр седәд цуг арһ-чидлән агсҗ дөрлдҗәлә, ил кичәлд, таньлдлһна керг-үүлдврт, эрдмчин класст цуг эв-дован үзүлхәр седҗәлә. Неквртә жюри эднә көдлмшиг үнлҗ олн зүсн балл тәвҗәлә. Аштнь орлцачнр марһана девсң болһна хөөн кен ямаран ормд һарсинь йилһҗ уралан йовхар шунҗала. Тиим чинвртә йовудтаһар марһан давҗала.
Аштнь хулһн сарин 5-д, Багшин өдрт нерәдсн байрин хургт «Багшин дебют» гидг таңһчин дөрлдәнә дииләчнрин нерд олнд медүлгдв. Көтчнрә района Сарпа селәнә дунд сурһулин эклц классин багш Кирян Марина һурвдгч орм эзлв. Гвардин майор С. В. Санчировин нертә Яшкуль селәнә 2-ч тойгта дунд сурһулин тууҗин багш Магомедова Мадина хойрдгч ормд һарв.
Элстин техникин лицейин эсвин багш Түрвән Церн дииләчнь болв. Түрүн болҗ баһ наста мергҗлт таңһчин марһанд орлцҗана. Энүг тасрхан угаһар техникин лицейин багшнр дөңнҗ, селвгәрн, дамшлтарн хувалцҗ дөң болҗала.
-Хамгин күнд кемнь ил кичәл өглһн болв,- гиҗ Церн Николаевич марһана тускар келв.- Яһад гихлә күүкд талдан сурһуляс ирв, түрүн саамд эднлә түргәр иҗлдх кергтә болв. Эдн цугтан 8-ч класст сурна, алгебрин нег төриг теднд цәәлһҗ өгләв. Эдн мини келсиг дигтәһәр медҗ авад, өгсн даалһвриг түргәр күцәв. Тер йовдл нанд ик урмд өгв.
Баһ наста багшнрин Элстин марһанд Түрвән Церн 2026 җилд хойрдад орлцҗ, бас негдгч ормд һарла, тегәд таңһчин марһанд орлцх зөв авла. Түрүн болҗ муниципальн дөрлдәнд 2024 җил орлцҗ һурвдгч үзмҗд күрлә. Түүнә хөөн Церн Николаевич Элстин техникин лицейд ирҗ көдлв. Хальмг ик сурһулиг төгсәснә хөөн Элстин 10-ч тойгта сурһульд көдлҗәлә.
Таңһчин марһан энүнд икәр таасгдв. «Хамгин түрүнд энд дамшлтан цааранднь байҗулҗ, педагогикин халхар немр медрл авч болҗана. Күнд-күчр кесг йовдлыг марһана йовудт давҗ һарув. Тернь мини заң-бәрциг батрулв. Эврәннь медрлән, эв-арһан, хоршасн эв-дован үзүлҗ мел уралан шунх кергтә бәәсмн. Дөрлдәнә таал йир ик үүмәтә, кесг халхин медрл болн эв-дов некдг юмн бәәҗ. Цуг орлцачнр баһ наста багшнр марһанд белдлһнә өөдән кемҗәһән үзүлв.
- Мана лицейин багшнрт чигн ик ханлтан өргҗәнәв. Эдн байн дамшлтарн хувалцад, нанд ик дөң болв, марһана нүүрт һарлһнд дөң болсн кесг нуувч эв-арһан нанд цәәлһҗ өгв, теднә дөң угаһар тиим күцәмҗ бәрҗ чадх уга биләв»,- гиҗ баһ наста багш тоолвран келв.
Марһана йовудт заң-бәрцән батрулҗ, ода Цугәрәсән дөрлдәнд орлцхар белдҗәнә. Терүнә келсәр, тернь дарук җилин мөрн сарин 27-д Москвад эс гиҗ Санкт-Петербургд болхмн. Түрүләд онлайн эв-арһар орлцлһн болхмн, терүнә ул деер орлцачнриг бас шүүҗ авх. Муниципальн болн таңһчин марһанд тиим холас кесн сөрлһн уга бәәсмн, гиҗ Церн Николаевич цәәлһв.
Хулһн сарин 5-д таңһчин залврин герт цуг мана багшнр Церн Николаевичиг йөрәв, энүнд дииләчин сертификат болн Күндллһнә һашг бәрүлҗ өггдв.
ҖААХАН Бадм

Видео