Эмнлһнд бәәдг бичкдүдиг дөңнәд

10-10-2026, 11:23 | Общество

Һаха сарин 1-әс авн хулһн сарин 1 күртл мана таңһчд «Коробка храбрости» буйнч керг давулгдв. Эннь җил болһн эмнлһнд бәәдг көвүд-күүкдиг дөңнлһнә туст бүрдәгднә.
Сара хонгин туршарт буйнч седклтә нег һазра улс дөрвн миңһн һар олн зүсн наадһа, дегтрмүд, бичкдүдин билг-эрдм делгрүлдг тоот цуглулсн болдг.
«Негдсн Әрәсә» партин Элстин әңгин сегләтр Максим Сорокин Улсин Хуралын (Парламентин) депутат Пүрбән Олегла болн «Молодая гвардия» олна бүрдәцин нүүрләчнрлә хамдан эрүл-менд харлһна бүрдәцст цуглулсн тоотан авч ирв. Эмнлһнд бәәсн бичкн болһн таасгдсн наадһа авч чадв. Максим Сорокин буйнч кергт орлцсн цуг улст ханлтан өргв.
Тодлхас, «Коробка храбрости» буйнч керг-үүлдвр «Негдсн Әрәсә» партин Улсин көтлвр күцәлһнә йовудт давулгдна. Эн көтлвр мана орн-нутгин социальн төрмүд хаһллһнд туслна, гиҗ онц темдглх кергтә.
КАРСАНА Евгения

Видео