Хальмг артисткин үүдәгч күцәмҗ

Сегодня, 12:11 | Общество, Таңһчин зәңгс, Зіњг, Сойл

Хальмгин баһчуд билг-эрдмәрн нер һарч йовдг зәңг мадниг даңгин байрлулна. Шидр Японяс сән зәңг ирв. Мана хальмг артистк Киштән Амулң ик тоомсрта киномөрән лауреат болснь цуг мадниг байрин седкләр дүүргв.
Японя Тотиги балһснд болсн нарт-делкән кинонаадмд күүкд улсин иткмҗтә дүр бүрдәсндән Амулң мөрәһәр ачлгдсмн. «Заян» гидг нертә ахр кемҗәтә фильмд хальмг күүкнә тогтасн дүр тиим өөдән үнллһ олсмн.
Хар Һазра района Комсомольский селәнд өсч-боссн Амулңгиг селәнә әмтн сәәнәр меднә. Бичкнәсн авн күүкн билг-эрдмин туст оньган өгч йовсмн. Селәнә болн района сойлын бәәдл-җирһлд Амулң орлцҗ йовла. «Селәнә сойлын Герт өссн күүкн» - гиҗ билгинь үнлҗ, Амулңгин тускар селәнә әмтн келнә. Сойлын Герин үүлдврт шунҗ орлцад, күүкн дунд сурһуль төгсәтлән «Цецг» бииһин коллективин ханьд биилҗ йовла.
«Мельпомена» театрин студин һардач Сарңга Валентина күүкнә билгиг үзәд, эврәннь студин үүлдврт орлцулад, наадд белдлһнд, дүрмүд тогталһнд күүкнә билг-эрдмиг зөрүләд, делгрлтин йовудт чик заавр өгсмн. Эн үүлдврин ашт күүкн театрт дуран өгәд, эн халхар сурһуль сурхар шиидв.
Сурһулян төгсәһәд, 2007 җилд Амулң М. Щепкинә нертә Москван театрин күрәлңд орҗ сурв. Актерск эрдмиг арднь орҗ дасад, күүкн эн ик сурһулян йилһән сәәнәр төгсәһәд, төрскн Хальмгтан ирәд, Келн-улсин театрт көдлдг болв.
Актерск билг-эрдм зуг һанцхн сурһуляр төгсхш, көдлмшин йовудт, җирһлин туршарт эн эрдмиг дасх кергтә болна. Күн болһн әдл болхшлм, тер учрар, тедниг тәәз деер, эс гиҗ кинод үзүллһн басл ик дааврта керг мөн. Медрл, дамшлт болн билг кергтә. Цуг терүгинь Амулң сән меднә.
Баһ настаһасн авн дурлсн эрдмнь сурһулин йовудт шин янзар немгдәд, театрт көдллһн дамшлт өгәд, Амулң «Заян» нертә фильмд иткмҗтә дүр тогтаҗ чадв.
Баһ наста режиссер Очра Саглр энүг цокч авсмн. Эннь үүдәгч хаалһд орҗадг режиссерин түрүн көдлмш болҗана. Шин кинон Москван сурһульд Олег Дормана мастерскойин кемҗәнд Саглр энүг белдҗ, кинон наадмд йовулсмн.
2025 җилд фильм Хальмгт хошт цокч авгдсмн. Теегт мал өскҗ бәәдг өрк-бүлин бәәдл-җирһлиг режиссер үзүлҗ чадв. Өдр болһни көдлмшән кеһәд бәәдг улсин җирһл ямаран болдгиг, теегт бәәдг әмтнә хоорндк хәрлцәг медҗ болхмн. Таңһчин әмтнд йирин дасгдсн бәәдл болдг тоот талдан һазрин улст, тер дотр киношалһачнрт болн наадмин жюрин оньг эзлснь йир сән гих кергтә.
Японьд болдг эн наадмд орлцхар 110 көдлмш жюрин оньгт тусхагдсн билә. Тер олн тооһас 8 кинофильм шишлң комиссь шүүҗ авсмн. Хальмг кинокөдлмш тер тоод орснь маднд ик байрта.
Иигәд «Заян» гидг фильмиг талдан һазрин орлцачнрас нань Японя олн хәләһәчнр хәләв. Хальмг улсин бәәдл-җирһллә хол Дорд үзгин нег арлд бәәдг Японь нутгин әмтн таньлдҗ, Европин нег захд Әрәсән медлд Хальмг Таңһч бәәхинь медҗ авв.
Хальмг кинематографин төлә эннь ик күцәмҗ болҗана. Баһ наста хальмг режиссер Очра Саглр белдҗ тәвсн эн фильм Японьд нарт-делкән наадмд үзүлгдҗ, мөрәлгдсн йовдл Хальмгин сойлын җирһлд темдгтә йовдл болснь лавта.
ҖИРҺЛИН Кермн

Видео