Селәнә эдл-ахун көдләчнриг темдгләд

10-10-2026, 11:34 | Общество, Таңһчин зәңгс, Зіњг, Селәнә эдл-аху

Җил болһн хулһн сарин хойрдгч долан хонгин нарн өдрлә мана орн-нутгт селәнә эдл-ахун халхар көдлдг улсиг темдглдг авъяста. Эн өдрт мал өсклһнә, тәрә тәрлһнә, эдл-ууш кеҗ һарһдг болн АПК-ан халхар көдлдг мергҗлтнриг йөрәҗ, ач-тусинь хәрүлдг йоста.
Хальмг таңһчд селәнә эдл-ахун халх экономик делгрүллһнд онц орман эзлнә. Ик кезәнәс авн мана өвкнр нүүдл улс болсн төләдән эң-зах уга у-өргн теегт дөрвн зүсн малан өскәд, өрк-бүлмүдән теҗәдг бәәсмн. Эндр зәрмнь аавнрин-эцкнрин үлгүрәр тохма бод малан, хөөдән асрад, таңһчин АПК-н халхиг делгрүлҗ йовна. Терүнәс нань мана таңһчин фермермүд сүл җилмүдт хамгин элвг урһц хураһад, ик күцәмҗ бәрәд йовхиг темдглх кергтә. Тер мет өдгә амр биш цагт нег һазра мана арһлачнр олн зүсн эдл-ууш кеҗ һарһад региона экономикд бас тәвцән орулҗана.
Темдглхәс, Хальмгин Толһач Хаска Бату селәнә эдл-ахун халхд, нег үлү мал өсклһнд даңгин онц оньган тусхана. Мана фермермүд шаңһас дөң авч, тустаһар олзлҗана.
Селәнә эдл-ахун көдләчнрин сән өдр угтҗ хулһн сарин 7-д Москва балһснд «Алтн намр-2026» Цугәрәсән селәнә эдл-ахун XXVIII һәәхүл көдлмшән экләд эндр төгсчәнә. Чинртә һәәхүл «Тимирязев Центр» сурһуль-һәәхүлин төвд болв. Хальмгин селәнә эдл-ахун министр Гаван Тимур һардҗ йовсн мана таңһчин делегац һәәхүлин көдлмшт орлцв. Тер мет делегацин ханьд АПК-н бүрдәцсин элчнр, нүүрлгч эдл-ахусин һардачнр орснь заах кергтә. Һәәхүлин көдлмшин тускар тодрхаһар цааранднь зәңглхвидн.
Өдгә цагт мана таңһчд 15 һар эдл-аху тохма хөд өскчәнә. Грозненск, сарпулин, советин меринос, хар һазра меринос болн сарпан тохма хөд өсклһнд фермермүд тәвцән орулҗана. Меринос тохма хөд 190 миңһн шаху то тогтана. Эннь талдан тохма хөөдин тооһас 80 процент тогтаҗана. Тер мет таңһчин фермермүд 320 миңһн һар бод мал өскчәнә.
Дәкәд темдглхәс, Яшалтан района Карл Марксин нертә СПК-д буудя эд-бод кедг бүрдәц көдлмшән күцәмҗтәһәр давулҗана. Орн-нутгин Өмн үзгин дуһргт эн хамгин ик бүрдәц болна. Энд мана таңһчин бәәтхә хам-хоша бәәдг регионмудын селәнә эдл-ахун арһлачнр буудя эд-бод кеҗ, көдлмшән өргҗүлҗ чадҗана. Өдгә цагин некврлә ирлцҗәдг бүрдәц нег часин туршт арвн хойр тонн буудя эд-бод кеҗ һарһна. Иим кевәр Хальмг Таңһч аграрн-индустриальн регионд хүврҗәнә гиҗ темдглх кергтә.
Терүнәс нань таңһчд селәнә эдл-ахун көдләчнр олар керглгдҗәснәс иштә Хальмгин АПК-н көдләчнрин дамшлтынь өөлдүлдг күрәлңгин ул деер «Фермермүдиг белддг сурһуль» нертә төсв сән йовудтаһар күцәгдҗәнә. Хальмг Таңһчин селәнә эдл-ахун министерств болн «Россельхозбанк» АО энүг бүрдәв. Төсвин йовудт таңһчин фермермүд болн эн халхар түрүн ишкдлән кеҗәдг улс шишлң сурһуль төгсәҗ, мал өсклһн болн урһмл урһҗ авлһн төрмүдәр ирлцңгү медрл авч чадҗана.
Удл уга үвлзллһнә дааврта кем эклхмн. Энүг сән аштаһар давулхин төлә нег һазра фермермүд малын хотан эртәснь белднә. Эдн хаша-хаацан ясад, дааврта кевәр үвлд белдҗәнә.
Хальмг Таңһчин селәнә эдл-ахун көдләчнриг өөрдҗәдг сән өдрләнь йөрәҗ, цааранднь ач-тусан күргҗ, АПК-н халхиг делгрүлҗ, күцәмҗтәһәр көдлхинь дурдҗанавидн!

КАРСАНА Евгения

Видео