Чаңһ-чиирг баһчудыг өскхин төлә

Сегодня, 13:05 | Общество, Таңһчин зәңгс, Зіњг

Хальмг Таңһчд нертә спортсменмүд баһ биш, Олимпийск наадна, нарт-делкән, Европин, Әрәсән марһасин дииләчнр тедн дунд зөвтә орман эзлнә. Хол 1966 җилд Элстин багшин училищт физкультурин әңг секгдлә. Энд сурһульмудын ирлцнгү багшнриг болн дамшачнриг белддг болв. Элстин багшин колледжин һардач Җамбинә Татьяна болн ирлцңгү сурһмҗин әңгиг толһалҗадг Мукөвүнә Галина «Калмыкия» зәңгллһнә бүрдәцд болсн харһлтд ончта өөнин тускар келҗ өгв.
«Мана колледж 60 җилин туршарт физкультурин багшнриг белдҗәнә, энд кесг сән авъяс батлгдсн бәәнә, мана ветеранмудын хоршасн дамшлт мергҗлтнриг белдлһнә һол ул-сүүрнь болна. Таңһчин сурһуль-эрдмин болн номин министерствин дөңгәр эн әңгин төлә шин кергсл хулдҗ авгдҗана, тернь улм сән мергҗлтнриг белдлһнд туслна. Эн җилмүдин туршарт һурвн миңһн һар багш белдгдв. Бидн кесг төсв күцәввидн, тер тоод колледжин талвңд оютнрин төлә өдгә цага ФОК тосхх зура бәәнә. Спортын марһаст шунмһаһар орлцдг уйн наста спортсменмүдиг дөңннәвидн, теднә мергҗлтиг өөдлүллһнд кергтә таал тогтанавидн», гиҗ Татьяна Николаевна харһлтыг эклв.
Колледж төгсәсн баһчуд мергҗлтән өөдлүлҗ цааранднь ик сурһульд сурхар зүткдгнь байрта. Кесг җилин туршарт Кубанск ик сурһульла сән залһлда бәрҗ нөкцлт батрулҗахин тускар гиичнр хувалцв. Колледж төгсәснә хөөн мана оютнр тенд мергҗлтән өөдлүлнә, зәрмнь сәәнәр сурад, аспирантурт орад, номин халхар күцәмҗтәһәр үүлднә. Хальмг ик сурһульла бидн бас бат залһлда бәрнәвидн, гиҗ колледжин һардач онц темдглв.
- Таңһчин сурһуль-эрдмин бүрдәцсин физкультурин багшнрин ик зунь мана әңг төгсәсн улс мөн, эдн чаңһ-чиирг селгә өсклһнд ик ач-тусан күргҗәнә. Кесгнь Хальмг Таңһчин ачта багшин өөдән нер зүүҗәхнь темдгтә. Ода эн әңгд 114 оютн сурчана. Әңгин 60 җилин өөнд нерәдҗ хулһн сарин 21-д «төгрг ширән» сүүр болхмн, физкультурин багшнриг белдлһнә тускар өргн күүндвр болхмн. Йирин болн спортын сурһульмудын багшнр болн дамшачнр, талдан чигн мергҗлтнр эн харһлтд орлцх. Хулһн сарин 23-д болхла өөнин байрин хург болхмн, - гиҗ Галина Николаевна күүндврт орлцв.
Шалтгта бичкдүдлә физкультурин кичәл давулдг багшнрин әңг секхәр энд зуралҗана. СПО-н бүрдәцст сурчадг шалтгта оютнр көдлмшч болн багшин эрдм сәәнәр дасхин төлә тедниг «Абилимпикс» җисәнд орлцулна. 2019 җиләс авн тер җисәнә таңһчин зүүцүләчнр болҗ багшин колледж үүлдҗәнә. Тер мет СПО-н бүрдәцст инклюзивн сурһуль оруллһна халхар 2018 җиләс авн колледж зүүцүләчнр болҗ кесг керг-үүлдвр күцәҗәхин тускар һардач бас цәәлһв.
Колледжин багшнр шин зура батлҗ, тедниг бәәдл-җирһлд тохрахин төлә баһ биш көдлмш күцәҗәхинь бас темдглх кергтә.
ТҮРВӘН Һуна

Видео