«Улсин ниицлт – Әрәсән күчн»

Сегодня, 13:31 | Общество, Таңһчин зәңгс, Зіњг

Улсин ниицлтин җилд Хальмг Таңһчд олн керг-үүлдвр болҗана, тер тоод сойлын халхар баһ биш тоот күцәгдҗәнә. Цевгә Анатолин нертә дууна коллектив «Улсин ниицлт - Әрәсән күчн» гидг нертә көтлвр белдсмн. Мана ик орн-нутгт бәәдг келн-улсин дууна дөңгәр әмтнә иньгллтин тускар келҗ өгх төр хаһлад, коллектив ик белдвр кесмн.
Эн ончта җилд нерәдсн концерт үкр сарин 8-д болсмн. Байрин концертин өмн Дагестанд болсн көгҗмин олн келн-улсин коллективсин ик харһлтд орлцсна тускар эдн «Калмыкия» зәңгллһнә агентствд келҗ өгв. «Улсин ниицлт - Әрәсән күчн» гиҗ келхләрн, бидн зәрмдән эн үгмүдин чинрт оньган өгхшвидн, - гиҗ дууна коллективин һардач болн художественн һардач Ольга Сердюкова келнә. - Орн-нутгт бәәдг олн келн-улсин коллективслә харһад, хамцу хәләврмүдт болн нань чигн керг-үүлдврт орлцад, бидн эн үгмүдин йоста чинринь медҗ авнавидн. Дагестанд болсн ик харһлтд олн келн-улсин билгтнр орлцв. Кен-негнәннь ду-көгҗм соңсад, Әрәсәд бәәдг келн-әмтн болһна билг-эрдм өвәрц болдгинь илднь үзҗ, соңсч медҗ аввидн. Кавказин келн-улсин көгҗм ик зуудан маднд әдл болҗ медгднә. Теднлә хам-хоша бәәдг хальмгудын билг-эрдм тенд үзүлгдсн тоотас йилһрәд бәәв. Хальмгудын өвкнр бурхн-шаҗндан нерәдҗ йовсн оюни айс соңсад, ут дууна дүүрәнд багтад, харһлтд орлцачнр икәр өврәд бәәв. Хоолан шахад дуулсн Һәрән Лиҗин дуд теднд икәр таасгдв. Кесг һазрас ирсн артистнр Лиҗин дууна эрдмәрнь соньмсч күүндҗәхинь даңгин үзҗ болхмн. Мана коллективин дун болн көгҗм цуг орлцачнриг соньмсулҗ тааслт олна. Цуг эннь маднд ик урмдта болҗана. Тиигәд сән седклтәһәр байрин концертд белдвидн, - гиҗ коллективин художественн һардач болн ах дирижер, Хальмг Таңһчин билг-эрдмин ачта үүлдәч Ольга Сердюкова келв.
Дууна коллективин байрин ик концертд орлцҗадг дуучнрин тускар ах хормейстер, Хальмг Таңһчин билг-эрдмин ачта үүлдәч Дорҗин Екатерина келҗ өгв. Әмтнә оньггт олн келн-улсин дун болн көгҗм тусхагдв. Һазр болһна көгҗм йириндән әдл болдго. Байрин эн концерт дәкн нег халхарн өвәрц болв. Түрүн болҗ концертд орҗадг дун болһна тускар келгдҗ, улсин иньгллтд дууна айс ямаран чинртә болдгинь медүлв. Коллективин дуулсн дун болһн негдҗ, тодлгдв, эн саамд режиссер Базыра Санҗин ач-тусинь темдглхмн.

ХӨӨЧИН Галина

Видео