Эрүл-менд харлһна төрмүд хаһлад

Сегодня, 11:27 | Общество, Таңһчин зәңгс, Зіњг

Әрәсән Президент Владимир Путин орн-нутгин иргнмүдин эрүл-менд харлһна, эмнлһсин ул батруллһна, баһ наста кадрмуд белдлһнә, эрүл-менд харлһна көдләчнрин мергҗлт өөдлүллһнә төрмүдт онц оньг тусхана. «Әмтнә эрүл-менд батруллһн энтн мана орн-нутгин делгрлтин һоллгч гисн керг-төр болҗана», гиҗ Владимир Путин темдглсн болдг. Әрәсән Федерацд эрүл-менд харлһна делгрлтин зура 2030 җил күртл батлгдад, эн төр дигтә-даратаһар хаһлгдҗ, эн халхар шаңһа көтлврмүдин болн келн-улсин төсвсин йовудт чинртә керг-үүлдврмүд күцәгдҗәнә.
Мана таңһчд эрүл-менд харлһна делгрлтин төрмүд хаһлгдҗ, эмнлһст бат ясвр кегдҗәнә, Б.Б.Городовиковин нертә Хальмг ик сурһульд эмнлһнә дацң секгдв, олн зүсн гемәс саглуллһна керг-үүлдврмүд давулгдҗана. Эн җил дәәнә ветеранмудын госпиталь, Приютна районд шин поликлиник секгдв. Таңһчин социальн-экономическ делгрлтин көтлврин йовудт «Цусна төвд» бат ясвр кегдв, шин кергсл углҗ тәвгдв. Үстин района эмнлһнд болн поликлиникд бас бат ясврин көдлмш кегдәд, сән кец-таал тогтагдв, 1970 җиләс авн шинрүлгдәд уга кергслин ормд өдгә цага КТ-аппарат тәвгдв. Эн җиләс авн мана таңһчд түрүн дөң күрглһнә халхин бүрдәцсиг шинрүллһнә ик көтлвр эклв, терүнә йовудт шаңһас 3,3 җува арслң йилһгдҗәнә. Ода балһсна поликлиникд, Баһ Дөрвдә болн Ик Буурла райодын эмнлһст бас бат ясврин көдлмш күцәгдҗәнә. Эн көтлврин йовудт райодын эмнлһст бат ясвр кегдхмн, өдгә цага шин кергсл хулдҗ авгдхмн гиҗ зуралгдҗана.
Күүкд улсин болн нилхдин эрүл-мендин бәәдл шинҗллһнә кергт орн-нутгин һардвр бас онц оньган тусхаҗана. Тиигәд, җил болһн диспансеризац давулгдна, саата күүкд улсин болн нилхдин шинҗллтин халхар немр керг-үүлдврмүд күцәгдҗәнә. Энүнә төлә нилхд төрлһнә эмнлһсин ул батруллһна төр бас күцәмҗтәһәр хаһлгдҗана. 2025 җилд О.Шунгаеван нертә нилхд төрлһнә Төвин ул батруллһнд 130 сай арслң йилһгдсмн, тер мөңгәр өдгә цага кергсл хулдҗ авгдв. Эмнлһнә бүрдәцин эмчнр мергҗлтән өөдлүлҗ, саата күүкд улст өөдән чинртә дөң күргҗ, эрүл-менд нилхд һархин төлә өдгә цага некврлә ирлцҗ үүлднә. Эн җиләс авн нилхдин эрүл-мендин бәәдл гүүнәр шинҗлгдҗәнә. Тернь ямр нег гем урдаснь илдкҗ, цаглань эмнлһ эклхд туслна.
Әмтнә эрүл-менд харлһна, олн зүсн гемәс саглуллһна, чик авг-бәрц батруллһна халхар бас аһу ик көдлмш күцәгдҗәнә. Хальмг Таңһчин Толһач Хаска Батун седвәрәр «Эрүл-менд бәәтн!» гидг керг-үүлдврин йовудт эмчнрин баг хол селәдәр йовҗ, әмтнд дөң-тусан күргнә. «Эрүл-мендин сө», гриппәс тәрлһнә, әмтнә эрүл-мендин бәәдл шинҗллһнә керг-үүлдврмүд дару-дарунь давулгдна.
Әрәсән Президент Владимир Путин әмтн дунд чик авг-бәрц батруллһна, медәтнр ут нас наслхин тускар бас келнә. Тиигәд, 2030 җил күртл иим улсин то 13 процентд өсх зөвтә. «Ах үйин улс» гидг келн-улсин төсвин болн «Шунмһа кевәр ут нас насллһн» көтлврин керг-үүлдврмүд болхла медәтнр ут нас наслҗ, эрүл-мендән батрулҗ, цаган сергмҗтәһәр давулхд туслна. «Иргнмүдин эрүл-менд харлһн орн-нутгин йосна һоллгч төр болҗана. Эн төр хаһлхла, талдан төрмүдиг чигн хаһлҗ чадхвидн», гиҗ Әрәсән Президент тоолҗана.

ДООҖАН Наталья

Видео