Шар шаҗна хург эклҗәнә

Сегодня, 11:36 | Общество, Таңһчин зәңгс, Зіњг

Эндр Элстд шар шаҗна баһчудын хург эклҗәнә. Үкр сарин 12-ас авн 16 күртл эн давулгдхмн. Мана орн-нутгин регионмудас ирҗ орлцх баһчудыг шар шаҗна гүн ном, сойл болн ирлцңгү медрл соньмсулҗана. Урҗ өдр эн хургин тускар дааврта улс тодрхаһар келҗ өгв.
Хальмг Таңһчин сойлын болн зуульчллһна министр Бембин Евгенийин келсәр, иим хург түрүн болҗ бүрдәгдҗәнә. Чинртә керг-үүлдвр давуллһна йовудт шар шаҗна номин шинҗләчнрлә олн зүсн харһлтс, билг-эрдмин кичәлмүд, соньн күүндврмүд болхмн. Тер мет ирсн гиичнр мана таңһчин сойлла болн авг-бәрцлә таньлдхмн, гиҗ Евгений Владимирович темдглв.
Йонтен Гевшин цәәлһсәр, өдгә цагин баһчудыг шар шаҗна ном икәр соньмсулҗадг болна. Зәңгллһнә олн эв-арһст энүнә туст хаҗһр тоот барлгдад бәәхәс иштә дорас өсч йовдг улст цәәлһвр өгх керг учрҗана. Иргчдән мел баһчуд шар шаҗна номиг цаарандан тархаҗ йовхмн, тегәд эндр бидн чик заавр болн медрл эднд өгх зөвтәвидн. Баһчудын ик хург шар шаҗна сүзгтнрин төв заллтын нилчәр бүрдәгдҗәдг болв.
Эндр Манҗин Аркадин нертә филармоньд шар шаҗна баһчудын хург байрин бәәдлд секгдхмн. Энүнд 200 шаху гиич ирҗ орлцхнь күләгдҗәнә. Дарани керг-үүлдврмүд Элстин агропромпаркин бәәрнд бүрдәгдхмн, энүнә тускар даруһас зәңгләд бәәхвидн.
КАРСАНА Евгения

Видео