Шар шаҗна төрмүдиг хаһлхар

Сегодня, 13:52 | Общество, Таңһчин зәңгс, Зіњг

Урҗ өдр Элстд Манҗин Аркадин нертә филармоньд шар шаҗна баһчудын хург байрин бәәдлд секгдв. Чинртә керг-үүлдвр үкр сарин 12-ас авн 16 күртл давулгдхмн. Шар шаҗна гүн номар, сойлар болн ирлцңгү медрләр соньмсчадг олн баһчуд Әрәсән регионмудас ирв.
Эндрк баһчуд ниигмин сүлҗәнд цаган давулна. Баахн көвүн Санан өдрин туршарт болсн йовдлмудыг цокч авад, Интернетин эв-арһар үүрмүдтән илгәнә. Нег дәкҗ көвүн теегт урһҗасн модна өөр ирәд зогсна, генткн ээҗиннь келсн үгмүд эн соңсна. Күн болһн эврә уңг-тохмта, өрк-бүл болһн эврә авг-бәрцтә, энүг мартх зөв уга, гиҗ келснь тодлв. Өдгә цагин компьютерин айс домбрин айсар, сәәхн бииһәр дару-дарунь сольгдад, баһчудын шар шаҗна хург эклсн болдг. Энүг тәвснь режиссер Цернә Санл, һол дүрмүдиг үзүлснь Басңга Баатрин нертә келн-улсин академическ театрин артистнр Нәдвдә Ольга, Боктан Алан болн Бүүрчин Бадм болв.
Баһчудын шар шаҗна хургт 18-әс авн 30 нас күрсн 140 шаху күн Бурятин, Тыван, Алтан Республикүдәс, тер мет Әәдрхнә, Москван мүҗсәс ирв. Б.Б.Городовиковин нертә Хальмг ик сурһулин оютнр терүнд шунмһаһар бас орлцҗана.
Кесг өдрмүдин туршарт чинртә керг-үүлдвр давуллһна йовудт шар шаҗна номин шинҗләчнрлә олн зүсн харһлтс, билг-эрдмин кичәлмүд, соньн күүндврмүд бүрдәгдхмн. Терүнәс нань ирсн гиичнр мана таңһчин сойлла болн авг-бәрцлә таньлдхмн. Эндр баһчуд шар шаҗна номар икәр соньмсчахнь темдгтә. Иргчдән баһчуд шар шаҗна номиг цаарандан тархаҗ йовхмн, тегәд эднд чик заавр болн медрл өгх кергтә болҗана гисн күслтәһәр эн керг-үүлдвр бүрдәгдв. Баһчудын ик хург шар шаҗна сүзгтнрин Әрәсән төв заллтын болн Хальмг Таңһчин Толһач Хаска Батун нилчәр бүрдәгдсн болдг.
Эн өдрмүдт һәәхүлин таңһчин төвд соньн керг-үүлдврмүд давҗана, терүнә йовудт Йонтен Гевш, таңһчин йога Федерацин толһач Зурһадан Дольган, Trend Travel Consulting нертә зуульчллһна бүрдәцин элч Мария Киселева, продюсер Никита Глухов болн талдан күндтә гиичнр баһчудла харһҗ күүндхмн. Энүнә тускар даруһас зәңглхвидн.
КАРСАНА Евгения

Видео