Дегтрмўдиг сольљ болшго

Сурєулин жилин чилгчір багшнр ирх љилд ямаран дегтрмўд кергтієинь кўўкд-кґвўдт келљ ґгні. Тегід эн ґдрмўдт эк-эцкнр кўўкдтін хувц-хунр, сурєульд кергті дегтрмўд хулдљ авцхав.

Харм тґрхд, сўл љилмўдт дегтрмўдин ўн кесг холванд ґсв, дікід дегтр кезі барас єарснь учрт авгдна. Шин љил эклхлі, зірм дегтрмўднь сурєульд керглгдхш. Тегід тер дегтрмўдін эк-эцкнр лавкд хірў ґгхір, эс гиљ талдан дегтрт сольхар седхлі, зірм лавкс хірў авхш. Юњгад? Учрнь олн.

Эк-эцкнриг ўўмўлљіх сурврт Хальмгт ўўлддг Роспотребнадзорин заллтын хулдачнрин зґв харсдг іњгин ах специалист Жанна Эрендженова иим ціілєвр ґгв:

- Эн тґр кесг љилин туршарт біієіті. Ірісін Федерацин заканас ишті тас сольљ болдго болн мґњгинь хірў ґгдго эд-тавр бііні. Тедні тоод хот-хоолын биш 14 эд-тавр орна. Тедн дунд дегтрмўд, брошюрмуд, альбомуд, картографическ болн кґгљмин девтрмўд, буклетмўд болн лит. Август сарас авн мана заллтур дґрвн-тавн кўн ирљ, дегтрмўдиг сольхар седлівидн гисн эрлєін орулв. Теднд специалистнр тодрха ціілєвр ґгв. Ґдгі цагт дегтрмўд кимд биш, зірм лавксин хулдачнр талдан дегтрмўд бііхлі сольна, зірмнь тиигхш, тедні зґв. Тегід дегтрмўд хулдљ авсн цагтан оньган ґгід, чикір авторинь, кезі барас єарсинь хіліљ автн.