Төлин то олн болҗ

Сегодня, 14:19 | Общество, Таңһчин зәңгс, Зіњг, Селәнә эдл-аху

Таңһчин эдл-ахуст 2026 җилин төл авлһна дааврта кем төгсчәнә. Өдгә цагт энүнә ашнь диглгдҗәнә. Намрар Хальмг Таңһчин селәнә эдл-ахун министерствин зәңглсәр, АПК-н халхиг делгрүллһнә көтлврин халхар кесг малчнр болн фермермүд шаңһа дем авсмн. Мана таңһчд тәвн һар бүрдәцд хальмг тохма мал асргдҗана.
Эн җил таңһчин эдл-ахуст 1,4 сай шаху хөн болн 300 миңһн шаху толһа бод мал үвлзв. Таңһчин райодын зәрм эдл-ахуст төл авлһна кем эртәр эклв. Эн җилин зураһар цуг эдл-ахуст 100 үкрәс 100 туһл, 100 хөөнәс болхла 100 хурһ авх болҗ зуралгдҗасмн. Хөд ик зуудан мөрн сард хурһлв. Сән төл авхин төлә хөөчнр хаша-хаацан ясад, дулалад дааврта кемд белдв. Темдглхәс, чинәнь дор орсн малыг зәрм ормар бордад, шимтә өвсәр теткәд, арднь орҗ хәләв.
Одахн кесн то-дигәр, Хальмгин эдл-ахуст 1,1 сай хурһн тоод авгдв. Төл авлһна кемин ашар Яшкулин болн Хар Һазра райод йилһрв. Эднә эдл-ахуст авсн даалһвран күцәв гиҗ темдглх кергтә. Яшкулин района малчнр болхла 338 миңһн хурһ авсмн. Тер мет таңһчд төл авлһна кемд 200 миңһн саалин үкрәс 160 миңһн туһл авгдв.
Яшкулин района «Улан Хөөч» эдл-ахуд төл авлһна кемд Б.Б.Городовиковин нертә Хальмг ик сурһулин оютнр нөкд болв. Хальмгт эн эдл-аху оютнриг дааврта кемд орлцулдг һанцхн бүрдәц болна. Мөрн сарин 1-әс авн оютнр бәәрн малчнрт нөкд болв. Сурһулин йовудт авсн медрлән олзлв, олн җилдән көдлҗәдг малчнр эднлә дамшлтарн хувалцснь бас олзта-туста болв. Зоотехникчнр болн малын эмчнр болх баһчуд бүкл сарин туршарт малчнрин көдлмшлә таньлдв. Оютнр бешән түләд, худгас ус зөөһәд, хотан эврән белдәд эн-тер уга бәәв.
Хальмгин селәнә эдл-ахун министр Гаван Тимурин темдглсәр, мана таңһчин эдл-ахуст малын то зөвәр ик болҗахнь Әрәсәд чигн темдгтә болв. Мал өсклһнә халх таңһчин һардврин онц бүртклһнд бәәхинь тодлулх кергтә. Эн туст нег һазра малчнрт болн селәнә эдл-ахун арһлачнрт урдк кевәрн дөң-тусан күргәд бәәхвидн, гиҗ Тимур Сергеевич иткүлв.
Немхәс, ирх долан хонгт Элстд тохма малын Цугәрәсән һәәхүл давулгдхмн. Ода болхла нег һазра малчнр чинртә эн керг-үүлдврт орлцхар белдҗәнә.
КАРСАНА Евгения

Видео