Элистин зәңгс

09-04-2020, 18:50 | Таңһчин зәңгс » Зіњг

Әмтнд дөң болхар

ЭГС-ин ахлач Николай Орзаевин һардврт балһсна депутатнрин седвәрәр хальдврта гемәс саглулхин төләд хөрүллһнә керг-үүлдврмүд күцәҗәхин кемд иргнмүдт дөң күрглһнә зүүцүллһнә Штаб бүрдәгдв. Штабин һардачд депутат Олег Пюрбеев батлгдв, дөң күрглһнә зүүцүләчнь балһсна администрацин толһачин дарук Галина Васькина болв.
Эндр өдр хот-хол хулдҗ авхин төләд мөңг цуглулҗана. Таңһчин социальн делгрлтин, күч-көлснә болн көдлмшәр тетклһнә министерствин медлд хот-хол авх әмтнә багмуд йилһҗ авлһна зүүцүллһнә цутхлң тогтагдв.
Ода деерән социальн делгрлтин министерствин белдсн то-диглә ирлцәтәһәр зун күүнд хот-хол түгәҗ өгхмн. Хамгин түрүнд Төрскән харгсч Алдр дәәнә ветеранмудт болн икәр түрҗәх улст дем күргхмн. Хот-хол авх улсин то-диг әмтнә теткврин таңһчин комплексн цутхлңд тогтагдҗана. Тиигәрән 5-01-05 и 3-41-40 телефодын тойгудар җиңнүлҗ, бичүлгдҗ болхмн.
Элст балһсна администрац эврә һардач Дмитрий Трапезниковин һардврт ЭГС-ин депутатнрин седвәриг дөңнв. Тегәд эдн баһ теткүлтә әмтнд дөң болхар җалвасн мөңг өгхмн. Тер мет хулд-гүүлгәнә халхар үүлдҗәх арһлачнр бас эн буйнч седклин кергт эврә тәвцән орулх саната.
Эн төсвин һардач Олег Пюрбеев болн зүүцүләч Галина Васькина буйнч седклин керг-үүлдврин күцәлһнә йовудыг бүрткхмн.

Спортивн комплексин тосхлтыг дуусчана


«Спорт – норма жизни» гидг федеральн төсвин йовудт Элст балһсна 8-ч микрорайонд стадиона бәәдлиг шинрүлҗәнә. Аһуһарн 11 миңһн дөрвлҗн метр һазрт 100 зәәтә өдгә цагин спортивн комплекс тосхгдҗана. Энд футбол нааддг УЕФА-н некврмүдлә ирлцҗәх һазр, волейбол болн баскетбол наадлһна төлә шишлң орм, тренажермуд, 400 метрт гүүдг зам хаалһ болн спортар соньмслһна төлә кергтә нань чигн тоот бүрдәҗ бел кехмн.
Ода «Восточный» стадиона һазрт резинов девскр делгҗәнә, футбол наадх һазр бел кеҗәнә. Зәрм спортивн кегдлмүд углҗ тәвҗәнә. Апрель сарин чилгчәр шинрүллһнә көдлмшиг дуусад, стадион эдлврт орулгдхмн.

Хаврин көдлмш кеҗәнә


Таңһчин хотл балһснд олн улс хурҗ амрдг һазриг ясруллһна көдлмш кегдҗәнә. Һаза дуларад ирхлә, балһсна көк эдл-ахун көдләчнр урдк кевәрн хаврин көдлмшән эклв.
Балһсна 6-ч микрорайонд цецгүд болн шагшгуд суулһхин төләд һазр эд-бод кеҗ белдв. Тер мет көдлмшчнр 9-ч микрорайонд, «Буйслһн болн Босхмҗ» гидг бумблвин өөр-шидр зер-земшин модд суулһҗ көдлҗәнә. Колонск боодгин көвәһәр урһсн хулсиг хадҗ, шатаҗ, уга кеҗәнә. Юңгад гихлә түүмр учрдг әәмшгтә кем эклҗәнә. Зуни һаң халунд нигтәр урһсн хагсу урһмл шатад, түүмр учрх әәмшгтә.

АРЗАН Маргарита

Видео