Хаалһс ясчана

10-04-2020, 15:55 | Таңһчин зәңгс » Зіњг

Таңһчд хальдврта гем түглһнә туст бачм бәәдл тогтсн бийнь, РК-н тосхлтын, көлгн-күчнә болн хаалһин эдл-ахун министерств «Әәмшг уга болн сән чинртә көлгн-күчнә хаалһс» келн-улсин төсвиг күцәлһнә керг-үүлдврмүд цааранднь давулҗана.
Батлгдсн бооцанмудас иштә эн җилин апрель сврин нег шинәс авн региональн чинртә Утта-Үст-Цаһан Амн, Яшкуль-Комсомольск-Артезиан, Георгиевск-Буденновск-Улан Хол, Улан Хол-Лагань, Элст-Арзгир-Минеральные Воды, Баһ Дөрвд-Ик Царң хаалһсин участкст ясврин көдлмш эклв. Эн җил асфальтобетон хольвр бүркҗ кегдх региональн хаалһсин аһунь 473 688 дөрвлҗн метр тогтаҗана.
Хаалһсин девскриг сольхмн, тер мет хаалһсин хаҗудкиг ясрулхмн. Әәмшг уга хаалһин җисә теткхин төләд хаалһин 306 темдг, докъялһна 678 бичкн бахн, 538 катафот углҗ тәвхмн, зеткр учрх әәмшгтә һазрт 2000 метрт хашас тәвгдх. Дәкәд болхла хаалһст темдгллһнә татасд зурхмн.
Өөрхн иргчд Садовое-Абганерово болн Комсомольск поселкиг эргәд давҗ һардг хаалһсин участкст ясврин көдлмш кех подрядн организац йилһҗ авлһна марһан бүрдәгдх.
«Әәмшг уга болн сән чинртә көлгн-күчнә хаалһс» гидг федеральн төсвлә ирлцүлҗ, хаалһсин сеть делгрүллһнә шин эв-арһ үүлдхмн. Терүнәс иштә шаңһа мөңгн хаалһсин ясврин төлә һарһгдсн деерән цааранднь эдллһна төлә һарһгдхмн. Цуг эн кергт 659 сай шаху арслң йилһгдхмн. Эннь тосн-түләнә ьөлә акцизас орсн оруһин мөңгн болн келн-улсин төсвиг күцәлһнә кергт йилһгдсн мөңгн.

Хаалһс ясчана

Ясврин көдлмш цааранднь кегдҗәнә


Эн җил таңһчин Хар Һазра районд региональн чинртә Георгиевск-Буденновск-Улан Хол көлгн-күчнә хаалһиг цааранднь ясчана. Утдан 10 дууна хаалһин участкин ясврин көдлмш одахн эклв. Эн көдлмш урдк җиллә әдл «Әәмшг уга болн сән чинртә көлгн-күчнә хаалһс» гидг келн-улсин төсвин йовудт күцәгдҗәнә.
Марһана ашар онц арһлач М.Богатов хаалһин ясврин көдлмш күцәх зөвтә болв. Өдгә цагт хуучн хаалһин темдгүд цуцлҗ, һарһҗ авчана. Ормднь цаг зуурин темдгүд болн зәңгллһнә щитмүд тәвгдв. Хаалһин хаҗудкиг батрулхин төлә олзлгдх грунт зөөҗ авч ирҗәнә.
Эн өдрмүдт хаалһд һарсн нүкд ясч, хаалһин девскрин деерк давхринь тегшлҗ ясрулхмн. Ясврин көдлмшин йовудт хаалһд шин девскр делгх, хаалһин хаҗукинь батрулх, докъялһна шин 30 бичкн бахн углҗ тәвгдх, хаалһин 21темдг шинрүлгдх. Хаалһин ясврин кергт ут турштан 86 сай арслң йилһгдхмн

АРЗАН Маргарита

Видео