Зәңг. Ясврин көдлмш эклҗәнә

24-04-2020, 10:44 | Таңһчин зәңгс » Зіњг

2020 җилд «Әәмшг уга болн сән чинртә көлгн-күчнә хаалһс» гидг келн-улсин төсвин йовудт Элст балһсна 10 уульнцд 15,78 дууна хаалһс ясхмн. Темдглсн зурала ирлцүлҗ, Веткалован, Хомутниковин, Николаевин, Волковин, Чернышевскийин нертә, Степная, Волгоградская, 8 Марта, Северо-Западная уульнцст хаалһс болн Р-22 «Каспий» хаалһас балһснур ордг Северный подъезд ясхгдмн.
Одахн Элстин администрацин толһач Дмитрий Трапезников Веткалован нертә уульнцд хаалһин ясврин көдлмшин йовудыг бүрткв. Энд бордюрн чолуг цуцлҗана, хаалһин деерк хуучн девскриг салһҗ һарһҗ авчана. Балһсна һардач тосхлтын бригадмудын көдләчнрин тооһинь икдүләд цуг участкст дегц хаалһин көдлмш күцәх сүв-селвг подрядн организацд өгв.
Эндр өдр цуг объектсин туст төсвин-тооцана цааснь белн, шаңһа шинҗллтнь кегдсн бәәнә. Һурвн подрядн организцла - «РостовАвтоДор» РО ГУП-ла, «ДорСтройКом» ООО-ла болн «АБЗ» ОО-ла ясврин көдлмш келһнә туск бооцан батлгдв.
Элст балһсна адинистрацин болн таңһчин тосхлтын, көлгн-күчнә болн хаалһин эдл-ахун министерствин хоорнд батлсн бооцанас иштә 2020 җилд «Хаалһин сеть» гидг региональн төсвиг күцәлһнә кергт балһсна бюджетд 40 178,8 миңһн арслңга мөңгн йилһҗ өггдхмн.
Эн җил әрвлгдсн мөңгәр «Диилврин уульнцс» гидг төсвин йовудт Элстд дәкәд немр дөрвн уульнц ясгдх. Эннь Гермашевин болн Хониновин нертә уульнцс, Победын нертә болн Партизанск уульнцс мөн.

АРЗАН Маргарита

Видео