Хог-бог зөөҗ һарһҗана

23-04-2020, 21:52 | Таңһчин зәңгс » Зіњг

2019 җилин чилгчәс авн эндр өдр күртл Элст балһсна болн өөр-шидр бәәх селәдәс ут тоодан 30 миңһн кубическ метр хог-бог зөөҗ һарһгдв. Әмтн болх-болшго һазрт хог-бог асхад овалһна. Иим 24 орм илдкгдәд, хог-богас цеврлгдв. Һашун гидг салан өөр болн «Сәкүсн сүм» хурлас өмн-барун үзг тал бәәх һазрт хамгин икәр бог овалһата бәәҗ. Энд овалчксн хог-бог зөвәр ик һазр эзлҗәсн бәәҗ.
Элстин администрацин толһач Дмитрий Трапезников болх-болшго һазрт хог-богиг асхҗ овалдгиг хөрхин төләд эн туст керг-үүлдврмүдин диг-дара ухалҗ белдхиг Константин Шурунговд болн балһсна эдл-ахун заллтын ахлач Андрей Ивановд даалһв. Видео цокҗ авдг оборудовань олзлх, рейдмүд бүрдәх, тер мет волонтермудыг орлцулхиг, буру йовдл һарһдг улсиг административн дааврла харһулх, аца зөөөдг көлгн-күчн хог-бог зөөҗ һарһлһна туст ГИБДД-ла хамдан бүртклһ күцәх, нань чигн керг-үүлдврмүд күцәхәр зуралҗана.
Тер мет хог-богиг эврән зөөҗ һарһдг улсин төлә эн туст туслмҗин мөңг авлһна туск төрмүд бүртклһнд авх даалһвр өггдв.
Балһснд цевр-цер бәәдл тетклһнә төрмүд цааранднь чигн бүртклһнд бәәхмн. Болв балһсна әмтн бийснь чигн балһсан цеврәр бәрҗ, цевр-цер бәәдлиг хадһлх зөвтә. Шинкән ахулад цеврлчксн һазрт цөөкн хонг давсна хөөн дәкнәс хог-бог асхад овалдг йовдлмуд хара бишәр учрна. тегәд чигн балһсна цуг әмтнә нилчәр, олна күчәр эн бәәдлиг чиклҗ, эн туст диг-дара тогтаҗ болхмн.

АРЗАН Маргарита

Видео