Балһсна уульнцст хаалһс ясчана

20-05-2020, 18:36 | Таңһчин зәңгс » Зіњг

Элст балһсна уульнцсин хаалһсин ясврин көдлмшиг шунмһа кевәр күцәҗәнә. Одахн балһсна эдл-ахун заллтын ахлач Андрей Иванов Элстин администрацин һардврт хаалһин ясврин көдлмшин йовудын тускар тооца өгв.
«Әәмшг уга болн сән чинртә көлгн-күчнә хаалһс» гидг келн-улсин төсвин йовудт Элстин арвн уульнцд: Хомутниковин, 8 Мартын, Веткалован, Волгоградск, Волковин, Николаевин, Степная, Северо-Западн, Чернышевскийин уульнцсин хаалһст болн «Каспий» Р-22 федеральн хаалһас ар үзг талас балһснур ордг хаалһд ясврин көдлмш кеҗәнә. Утдан 12 дуунад хаалһс ясхмн.
Марһана ашар 4 подрядн организац ясврин көдлмш кех болв. «Росавтодор» РО ГУП зурһан участкд – 8 Мартын, Волгоградск (Ипподромн уульнцас Хомутниковин уульнц күртл), Волковин, Николаевин, Степная болн Чернышевскийин уульнцсин хаалһст ясвр кехмн. «АБЗ» ООО Северо-Западн уульнцд хаалһин болн ар үзгин талас Элстүр ордг хаалһин участкс ясхмн. «ДорСтройКом» предприять Хомутниковин болн Веткалован уульнцст хаалһсин ясврин көдлмш кех.
Балһсна эдл-ахун заллтын тооцана то-дигәр, хаалһсин участкст урдаснь темдглсн зурала ирлцәтәһәр көдлмш кегдҗәнә. Эндр өдр дөрвн участкд девскрин тегшлүллһнә давхр делгсн бәәнә. Эн кергт 5 миңһн тонн тосхлһна материал һарһгдв. Хаалһин көдлмшиг июнь сар эклтл дуусхар бәәнә.
«ДРСУ «Элиста-Автодор» предприятин көдлмшчнр Волгоградск уульнцд, Хомутниковин уульнцас Ленинә уульнц күртл хаалһин участкиг ясч шинрүлҗәнә. Эн көдлмшиг июнь сарин 15-д төгсәхәр зуралҗана.
Тосхлтын эклц девсңгәс авн кергиг дигтә-тагтаһар күцәҗәнә. Тегәд чигн ясврин көдлмш темдглсн болзгт дуусх гисн нәәлвр бәәнә.
Удлго «Диилврин уульнцс» гидг төсвин йовудт дөрвн хаалһ – Гермашевин нертә, Хониновин, Партизанская болн Победын уульнцсин хаалһс экләд ясхмн. Эн көдлмш әрвлсн мөңгәр кегдх. Эндр өдр ясврин көдлмш келһнә туст төсвин-тооцана цаасинь бел кеһәд, государственн шинҗллт кегдсн бәәнә. Ода болхла подрядн организац йилһҗ авлһна туст марһан бүрдәгдҗәнә.
Балһсна эдл-ахун заллт өдр болһн гилтә подрядн организацс яһҗ ясврин көдлмш кеҗәхиг бүрткҗ,, күцәҗәх көдлмшин чинринь шинҗлҗ бәәхмн. Дәкәд болхла хаалһин көдлмш кеҗәх предприятьмүд тосхлтын хөөн хурсн хог-богиг цаглань ахулх зөвтә. Көдлмшин йовудт малтҗ һарһҗ авад үрәсн урһа моддын ормд шинәс модд тәрхиг теднәс некхмн.
Көдлмшч селвлцәнә йовудт Дмитрий Трапезников балһсна өмн үзгин района кец-таалыг ясрулх төрт оьнган тусхах кергтә гиҗ келв. Энд шин школ тосхгдх, тегәд тер ормур күрдг хаалһ тосхх кергтә гив. Тегәд чигн Элстин өмн үзгин района кец-таалынь ясруллһна төсвин-тооцана цаас ухалҗ белдх кергтә гиҗ темдглв. Школ тосхгдх уульнцд хату девскртә хаалһ кегдх гиҗ балһсна эдл-ахун ахлач Андрей Иванов зәңглв. Эн района кесг уульнцсин хаалһсиг тосхлтын материалар бүркхмн.
Эн җил балһсна уульнцст ясвр кегдсн хаалһст әмтнә төлә таалмҗта зогсалмуд тосхгдх. дәкәд болхла муниципальн көлгн-күчн көдлҗ, әмтиг балһсар зөөхмн.

АРЗАН Маргарита

#ДорогиРеспубликиКалмыкия #Калмыкия08

Видео