Туслмҗин мөңгиг цаглань өгтн

01-06-2020, 08:24 | Таңһчин зәңгс » Жилищн-коммунальн эдл-ахун

Хальмгт хальдврта гем түглһнәс көлтә әмтнәс коммунальн туслмҗин төлә авдг мөңгн күцц цуглулгдҗахш. Апрель сарин ашар коммунальн организацс зүсн-зүүл туслмҗ күргснә төлә авдг мөңгнә зуг 50 процентнь хураҗ авсмн.
Хальмгт хальдврта гем түглһиг хөрлһнә туст немр керг-үүлдврмүдин туск зәрлг таңһчин Толһач батлв. Эн зәрлглә ирлцәтәһәр өртә чигн эдләчнриг, бюджетн организацсиг усар, электрокүчәр, газар теткдгиг зогсахмн биш гисн сүв-селвг коммунальн туслмҗ күргдг предприятьмүдт өгсмн. Эдләчнриг тасрхан угаһар теткҗ, нег үлү эмнлһнә болн гемәс хөрлһнә объектст онц оньг тусхагдх зөвтә. Әмтн организацст ирлго ууҗмд бәәв чигн коммунальн туслмҗ олзлсна төлә мөңгән өгч чадхин төлә таал тогтагдх зөвтә. Туслмҗин мөңгиг цаглань эс өгснд немр мөңг авхмн биш гисн заавр өгсмн.
Әрәсән Федерацин Правительствин тогтаврла ирлцәтәһәр эн җилин декабрь сарин 31 күртл коммунальн туслмҗин мөңгиг ял угаһар хооран сааҗ өгч болҗана. Болв РФ-н Гер-бүүрин кодексәс иштә эн җилин март сарин 31 күртл эс өгсн туслмҗин мөңгнә деернь ялын мөңгн немгднә.
Эндр өдр нәрн бәәдл тогтсмн. Әмтнә кесгнь көдлмш уга болад түрү бәәнә. Тегәд чигн олзлсн усна, электрокүчнә, газин болн нань чигн коммунальн туслмҗин мөңгиг цаглань өгч чадҗахш. Тегәд чигн цаг ирвәс өрн хурад, өрнә мөңгн икдәд йовна. Тер учрар арһарн, чадсарн туслмҗин мөңгән өгәд бәәтн гиҗ таңһчин ЖКХ-н болн энергетикин министерств олнд дуудвр кеҗәнә.
Коммунальн туслмҗин мөңгиг цаглань эс өгснд ялын мөңгиг цаг зуур авчахш. Болв олзлсн усна, электрокүчнә, газин, нань чигн туслмҗин төлә мөңгиг хөөннь болв чигн эрк биш өгх зөвтә. Тегәд чигн өр келго, коммунальн туслмҗин мөңгән цаглань өгтн гисн селвг эдләчнрт таңһчин ЖКХ-н болн энергетикин министерств өгчәнә. Мөңг өглһнә туст дааврта болх кергтә.

АРЗАН Маргарита


#НетКоронавирусу #Калмыкия #МинЖКХКалмыкии #СтопКоронавирус08 #
БудьБдителен #ОставайсяДома #МыВместе

Видео