Мана Байрта цаһан седклтә

16-10-2020, 15:07 | Таңһчин зәңгс » Селәнә эдл-аху

Селән һазрт эмч уга болхла дунд медицинск көдләч бәәрн әмтнә эрүл-менд харҗ, теднд түргн дөң күргнә. Эднә хәләврт бичкдүд чигн, медәтнр чигн бәәнә. Гемтсн цагтан бидн хамгин түрүнд терүнд җиңнүлҗ, дөң болхиг сурнавидн. Мана Көглт селәнд фельдшерск-акушерск пунктд медсестра Санҗин Байрта көдлнә. Эн өдр-сө уга селәнә әмтнд дөң болхдан белн бәәнә.
Байрта селәнә сурһуль төгсәснә хөөн Тамара Хахлынован нертә медицинск училищд сурсмн. 1985-ч җилд сурһулян төгсәһәд, эн күч-көлснә хаалһан эклсмн. Тер цагас авн һучн тавн җилдән Байрта Москеевна үнн-чик седклтәһәр көдлҗ, мана эрүл-менд харлһнд церглҗ йовна. Эн җилмүдин эргцд эн кесг күүнд тусан күргҗ, гемтсн цагтнь сән эмнлһ кеҗ, әминь аврв. Бийнь цаһан седклтә, һольшг, тевчңгү күн болна, тегәд бүлән үгәрн чигн маднд дөң болна. Гем келҗ ирдго гидг, тегәд сөөни өрәллә чигн җиңнүләд, дөң болхиг сурхла Байрта Москеевна дарунь гүүҗ ирнә. Мини көвүм бичкндән кинь давхцдг гемтә билә, тегәд нег дәкҗ өр цәәхин өмн бийнь тас уга болв. Тегәд мана медсестра дарунь ирәд, көвүндм дөң болв. Хам-хоша бәәдг нег залу бас сөөни өрәллә цусна дарлтнь өөдләд, эрүл-мендин бәәдлнь муурхла, мана Байрта Москеевна цаглань дөң болад, таңһчин эмнлһнд терүг күргәд эдгәв. Тиим йовлдмуд баһ биш бәәнә. Мана селәнд медәтә улс дала, тегәд тедн дунд кесгнь хуучта болна, эднд генткн дөң керглгднә. Селәнә сурһульд 60 күүкн-көвүн сурна, тегәд бичкдүдин то бас ик гиҗ тоолҗанав. Тегәд күн болһнд эрүл-менд харлһна көдләчин дөң кергтә болна.
Көдлмштән дааврта, кергән сәәнәр меддг, кен ахан күндлдг, бичкдүдиг эвләд өкәрлдг төләдән Санҗин Байрта селәнә әмтн дунд тоомср болн күндллһ олв. Эн селәнә депутатнрин Хургин хойр хуралтын депутатд суңһгдсмн. Селәнә олна бәәдл-җирһлд, энд таал ясрулһна төрт эн шунмһаһар орлцна. Өрк-бүлдән Байрта Москеевна ээлтә эк болн эңкр аваль болна. Герин эзнь Нимә Гаряевич крестьянск-фермерск эдл-аху бәрнә, ууһн көвүнь эцктәһән малын хошт көдлнә. Авальнь, һурвн үрнь, ачнр-зеенрнь Байрта Москеевнад итклтә түшг болҗ, кеҗәх көдлмшнь әмтнд туста болҗахиг меднә.
Мана селәнә ФАП-д хуучн көлгн бәәнә, дару-дарунь тернь эвдрнә. Хәрнь җолач Бахарчин Тагир һартан өөтә болад, эвдрсн зииһинь соляд, терүг ясад авна. Болв маднд сән көлгн кергтә болҗана. Өдгә цага шишлң көлгнд кергтә кергсл бәәнә, тегәд тернь бәәрн әмтнә әм аврлһнд туслхнь лавта. Эрдмдән итклтә, селән һазрт үнн кевәр көдлҗ йовх эрүл-менд харлһна көдләчнриг урмдулх кергтә гиҗ сангдна.

Владимир ДЖИЛЕЕВ,
Көтчнрә района Көглт селән

Видео