Малан асрад өрк-бүлән теҗәнә

Сегодня, 14:45 | Общество, Таңһчин зәңгс, Зіњг, Селәнә эдл-аху

Баһ тетквртә, көдлмш уга үлдсн, олз-орунь баһрсн улс социальн бооца батлад, шаңһас демин мөңг авч чадна. Мана таңһчд социальн бооца батллһна көтлвр 2021 җиләс авн күцәгдҗәнә. Тавн җилин эргцд 3 миңһн күн бооца батлад, эврә керг секәд эс гиҗ дөңцл эдл-аху асрдг болад, олз-оруһан икдүлҗ өрк-бүлән теҗәдг болв. Эн җилмүдин эргцд кергт ут тоодан 600 сай арслң шаңһас йилһгдснь темдгтә. Эн җил мана таңһчд 719 күн социальн бооца батлҗ, җирһлин күнд таалас һархин төлә шаңһа демин мөңгиг олзлҗ чадхмн.
Көтчнрә района Көтчнр селәнд бәәдг Бамбушевихнә өрк-бүл нидн социальн бооца батлад, мал хулдҗ авлһнд 200 миңһн арслңга дем авсн билә. Эрдни Владимирович болн Алена Валерьевна эн һазра улс, бичкнәсн авн селән һазрт өсәд-боссн төләдән мал асрхин төлә залхурлго көдлх кергтәг сәәнәр меднә. Эднә таньл-үзл одахн социальн бооца батлад мал хулдҗ авад эврә дөңцл эдл-аху асрдг болсмн. Теднә үлгүрәр Бамбушевихн бас эн көтлврт орлцх шиидвр авсмн. Эдн урднь цөөкн така, һаха, хурһд болн яма бәрдг билә, тегәд шаңһа демин мөңгәр хойр үкр болн бүрү хулдҗ авв. Келхд, эдн экин сертификатын мөңгәр эврә гер хулдҗ авсн билә, тегәд мал бәрхин төлә немр хаша тосхад, сән таал тогтав.
- Селән һазрт бәәдг төләдән бидн бичкн эдл-аху бәрдг биләвидн. Отхн көвүнәннь эрүл-менд батрулхин төлә яма хулдҗ авсн биләвидн. Малд кергтә хаша-хаац тосхҗ, өвс болн буудя хадһлх таал тогтаввидн. Шаңһа көтлврт орлцад, мал хулдҗ авсндан байрлҗанавидн. Иргчдән эдн төл өгәд, мана эдл-аху өсх гиҗ нәәлҗәнәвидн. Бидн үс, өндг, мах хулдҗ авхшивдн. Сән чинртә эдл-ууш бәәнә, тегәд медәтә эк-эцкнрән бас теткнәвидн. Мана селәнд усн бәәнә, тегәд герин һаза сад-һаруд бас суулһнавидн. Олн зүсн темснә байн урһц хураҗ авад, үлүһинь эд-бод кеҗ үвлд белднәв. Эн хаврар зер-земшин модд суулһх санан бәәнә, – гиҗ Алена бер келнә.
Ууһн Руслан арвн тавта, отхн Вова тавта, эдн эк-эцкәсн үлгүр авч, бичкнәсн авн мал асрдгиг дасч авчана. Отхн көвүнь ода чигн бичкн, эн такаст буудя өгнә, Руслан болхла малд хот өгәд, услад, сән нөкд болна. Герин эзн һартан эвтә, бәрсән кедг залу күн мөн, тегәд көвүд эцкән дахад бас көдлмшч болҗ өсхнь лавта. Эрдни Владимирович района эмнлһнд, Алена Валерьевна болхла бичкдүдин садт көдлнә, эдн өрүн эрт босад, малан асрад, герин көдлмш кенә. Герин эзн хальмг күн, авальнь болхла орс, тегәд эдн хойр келн-улсин авъяс хадһлҗ, ниитә бәәнә. Алена Валерьевна хальмг боорцг, орс билән болһҗ, Масленица болн Цаһан Сар байрин өдрмүдт гиичнрән тоона. Шидр селәнә сойлын герт болсн керг-үүлдвр эн Руслан көвүтәһән орлцад, билг-эрдмән үзүлв.
Района әмтнә социальн харслтын цергллтин көдләчнр социальн бооца батлх шиидвр авсн улст нөкд болҗ, бәрмт цаас цуглулҗ авхд сүв-селвгән өгнә. Бамбушевихнә өрк-бүлд эдн бас нөкд болсмн. Давсн җилин моһа сард эдн бооца батлад, шаңһа көтлврт орлцв. Эврә дөңцл эдл-аху бәрҗәдг өрк-бүл шаңһа дөңгәр олз-оруһан икдүлсн деерән бийсән сән чинртә эдл-уушар теткдг болв. Мал асрхла амн тоста гиҗ хальмг үлгүрт келгддгәр, эдн өрк-бүлән үсәр, махар тетксн деерән дорас өсч йовдг хойр көвүндән чик сурһмҗ өгчәхнь байрта.
ДООҖАН Наталья

Видео