Арһлачнрт – 35 сай арслң

20-11-2020, 15:48 | Таңһчин зәңгс » Зіњг

Коронавирус гем учрад, эпидемиологическ нәрн бәәдл тогтснас иштә һарутсн арһлачнрт дөң күргхин төлә таңһчин бюджетәс 35,4 сай арслң йилһгдв. Эн хальдврта гемин пандемийәс көлтә баһ болн дунд бизнесин һару дор унв. Кесг арһлач эн күнд цагла үүлдврән зогсаҗ, күчр бәәдлд тусв.
- Бидн арһлачнрт эрк биш дөң күргх зөвтәвидн. Юңгад гихлә энтн зуг арһлачнрин олз-оруһин төр биш, энтн хамгин түрүнд көдлмшч орм хадһллһна чинртә төр болҗана. Арһлачнр эн демин мөңг авхин төлә таңһчин экономикин болн хулд-гүүлгәнә министерствин марһанд орлцв. Эн җил ноха сарас авн хулһн сар күртл баһ болн дунд бизнесин элчнр көдлмшч ормс хадһллһна болн көдләчнртән җалв өглһнә халхар учрсн һарун зәрм хүвинь даңцалһнд дем авхин төлә эрлһән болн документсән орулсн билә. Тер марһана ашар 217 арһлач диилвр бәрәд, 16 860 700 арслңга дем авх зөвтә болв,- гиҗ таңһчин толһач келв.
Тер мет 2020-ч җилин хулһн сарин 5-с авн 19 күртл таңһчин экономикин министерств эн җил көдләчнртән җалв өглһнд мөңг өгъялсн арһлачнрт терүг даңцалһнд субсидь өглһнә марһа зарлв. Терүнә ашар 31 арһлач 18649971 арслңга дем авв.

ДАВАН Наталья

Видео