Таңһчин эмчнр даавртаһар үүлдв

11-01-2021, 16:33 | Таңһчин зәңгс » Зіњг

БАДМ-Һәрән Очр, П.Жемчуевин нертә таңһчин эмнлһнә ах эмч:
- Эн җил лу сарас авн би таңһчин эмнлһнә ах эмч болҗ көдлҗәнәв. Шин үүлд орсн цагтан кех-күцәх керг-үүлдврмүдин зура батлҗ эркн чинртә төрмүд диглҗ авсн биләв. Зуг коронавирусн гем мана бәәдл-җирһлд учрад, цуг зуралсн тоотыг хооран сааҗ эн хальдврта гемәс хөрлһнд цуг арһ-чидлән олзлхиг некв.
Сүл хойр җилин эргцд мана таңһчин эрүл-менд харлһна халхиг шинрүллһнә, эмнлһнә бүрдәцсин материальн-техническ ул батруллһна, күргҗәх медицинск туслмҗин чинриг өөдлүллһнә керг-үүлдврмүд күцәгдҗәнә. Терүнә медлд давсн җилин чилгчәр таңһчин эмнлһнә «Б» болн «В» корпусмудын ясврин көдлмш кегдв. Энд шин лифтмүд углҗ тәвгдв, 200 медицинск кергсл хулдҗ авгдв. Эн җилин чилгч күртл немр УЗИ-аппаратмудар, цусна дарлтнь өөдләд күнд кевәр гемтсн улсин төлә шишлң 20 орар теткхвидн.
Хөн сарас авн мана эмнлһнә улд хальдврта гемәс эдгәлһнә госпиталь секгдв. Харм төрхд, мана эмнлһнә көдләчнр госпитальд көдләд кесгнь бас гемтв. Болв кедү күнд болв чигн бидн арһ-чидлән агсад, гемтә улсин әм аврлһнд үнн кевәр церглҗәнәвидн. Кесг мана көдләчнр хәрлго, өрк-бүлән кесгтән үзлго госпиталь секгдснәс авн көдлҗәнә.
Коронавирусн гем учрсн бийнь талдан олн зүсн гемәр әмтн гемтнә, тегәд бидн цугтаднь дөң күргҗ үүлдҗәнәвидн. Эн җил йир күнд билә, шин хальдврта гемәс хөрлһнә халхар мергҗлт өөдлүлх кергтә болв. Би мана эмнлһнә цуг көдләчнрт ик ханлтан өргҗәнәв. Цуһар ниитәһәр көдләд, кергән даавртаһар күцәв. Шин җилд цуһар эрүл-менд, өөрхн улстаһан, үр-иньгтәһән менд-амулң бәәтн гиҗ мана таңһчин цуг улст дурдҗанав.

Барт белдснь ДООҖАН Наталья

Видео