Хаслһна диг-даран дәкнәс утдулгдв

19-01-2021, 09:50 | Общество, Зіњг

Хальмг Таңһчин Толһач Хаска Батун зәрлгәс иштә хаслһна диг-даран лу сарин 14 күртл утдулгдв. Тер зәрлгәр 65 наснас ах улст гемәс саглҗ гертән бәәлһнә туст селвг өггдҗәнә. Иим шиидвр коронавирус гем түглһнәс хөрлһнә штабин сүүрин ашар батлгдв. Харм төрхд, мана таңһчд эпидемиологическ бәәдл ясрад уга гиҗ сүүрт темдглгдв. Терүнәс иштә мана таңһчд чирәдән медицинск хааһул өмслһнә болн нег-негнәсн күсдундур метрт бәәлһнә туст неквр эрк биш күцәгдх болҗана.

Хальмг Таңһчин эрүл-менд харлһна министерствин өцклдүрк зәңгллһәр, пандемий эклснәс авн мана таңһчд 16494 күн эн хальдврта гемәр гемтв. Сүл хонгт дәкәд 83 гемтсн күн илдкгдв. Нидн хаврар коронавирус гем түглһнәс авн мана таңһчд 13744 күн эмнлһ авсна хөөн эдгв, сүл өдр 69 күн теднә тоод немгдв. Һундл төрхд, сүл өдрмүдт эн әәмшгтә гемәс көлтә әмнәсн хаһцсн улсин то икдәд, 228-д күрв.
Ода эмнлһнд бәәх 832 күүнәс 25-нь күнд кевәр гемнҗәнә, 15 күн ИВЛ-аппаратд бәәнә. Гемнь гиигнәр давҗах улсин то 4389 болна, эдн гертән эмнлһ авчана. Райодын госпитальмудт эмнлһ авчах улсин то баһрҗахш. Тиигәд ода Яшкульд – 50, Үстин – 24, Көтчнрә – 32, Хар Һазр – 31, Яшалтан – 24, Приютна – 23, Городовиковск райодт– 27 күн эмчнрин хәләврт бәәнә. Гертән 3994 күн бәәнә, эдн хальдврта гемәр гемтсн улсла хәрлцсн эс гиҗ гемнь гиигнәр давҗах улс болна.
Мана зәңгч

Видео