Йовһар йовснь туста болхмн

23-01-2021, 14:11 | Таңһчин зәңгс » Зіњг

Хальмг Таңһчин эрүл-менд харлһна министерствин зәңглсәр, пандемий эклсн цагас авн мана таңһчд 16820 күн эн гемәр гемтв. Теднәснь 14158 күн эмнлһ авсна хөөн эдгв, тер дотр сүл өдрт – 154 күн мөн. Сүл хонгт кесн шинҗллтсин ашар, 77 күүнд эн хальдврта гем илдкгдв. Тегәд өцклдүрк тооһар эдгсн әмтнә тонь гемтснәснь хойр холван ик болҗана. Эннь байрта йовдл мөн.

Таңһчин эмнлһсин улд үүлдҗәдг госпитальмудт 787 күн эмнлһ авчахнь медгдв. Теднәс 25 күн күндәр гемтҗәнә, 14 күн ИВЛ аппаратар ки авчана. Дөрвн миңһнәс үлү күн гемтә улсла хәрлцсн төләдән гертән бәәнә, эднә бәәдлиг эмчнр бүрткнә. Район болһнд гемтсн улсин тонь иим: Яшкулин районд – 41, Көтчнрә – 29, Хар Һазра – 22, Городовиковск – 23, Приютна – 20, Үстин райодт – 14, Лаганьд – 20 күн эмнлһнд бәәнә.
Коронавирус гем урднь үзгдәд уга гем болна. Җилин туршарт эн хальдврта гемлә мана таңһчин, Әрәсән, цуг нарт-делкән эмчнр ноолда кеҗ, мадниг эн аюлас аврчана. Эн гем нег күүнәс талдан күүнд хальддгинь ода күн болһн сәәнәр медсмн. Тегәд олн-әмтн цуглрдг һазрт саглуллһна некврмүд эрк биш күцәх кергтә. Һазаһас орҗ ирхләрн һаран сәәнәр уһах кергтә, рециркулятор уга болхла терзән секәд цевр аһар орулхла сән болхмн. Пандемий эклснәс авн кесгнь олна көлгнә ормд йовһар йовдг болв, тернь цогц-махмудт чигн туста болҗахнь маһд уга. Тегәд олн-әмтн бәәдг һазрт чирәдән хааһул өмстн, һаран эд-бод кетн гиҗ бидн дәкн нег келҗ, цуһар эрүл-менд бәәтн гиҗ дурдҗанавидн.
Мана зәңгч

Видео