Көтчнрәхн хурл босхх күслтә

28-01-2021, 09:28 | Таңһчин зәңгс » Зіњг

Нидн намрар Көтчнр селәнд Әрәсәд, Моңһлд болн СНГ-н орн-нутгудт Дала ламин гегәнә күндтә элч, Хальмгин шаҗн лам Тэло Тулку ринпоче хурл босхх һазр әрүслсн билә. Мөргүл давулгдсна хөөн хурлын тосхлтын көдлмш эклв. Келхд, района әмтн хурлын тосхлтд ик эртәснь мөңг цуглулв.

2020-ч җилин эклцәр бүрдәмҗин комитетин сүүр болв, терүнд хурл тосхлһна керг эклхин төрмүд хаһлгдсн билә. Тер хургт орлцсн бәәрн фермермүд түрүн демән күргҗ, тосхлтын саңд 155 миңһн арслң орулв. Тиигәд, малчнр Анҗан Сергей, Ивана Вячеслав, Натра Михаил, Шерехтин Нимә 20-50 миңһәд арслңга дем күргсн билә. Района бәәрн улс, күч-көлснә коллективс, энд урднь көдлҗ йовсн эс гиҗ эн һазра эк-эцкнрин күүкднь эн кергт шунмһаһар орлцҗана. Бүрдәмҗин комитетин гешүн, района «Алтн булг» газетин редактор Эрнҗәнә Раисан келсәр, эн зунар Б.Б.Городовиковин нертә ик сурһулин оютн Борлга Очр амрлһндан көдләд, олсн мөңгнәсн 2 миңһн арслң хурлын тосхлтд орулхар шиидв. Түрүн болҗ олсн мөңгнәннь дееҗиг эн әрүн кергт орулхар шиидснь буйнч седклинь медүлҗәнә гиҗ Раиса Петровна келв. Дәкәд Казань балһснд эмчәр көдлҗәх Шаран Майя түрүн зергләнд мөңгән орулв. Эн Көтчнрт өсәд-боссмн, экнь Наталья Борисовна района эмнлһнд көдлҗ йовсмн, ода Ия дү күүкнь энд медсестра болҗ көдлҗәнә. Таңһчин меҗә һатц талдан регионмудт бәәтхә, һазадын орн-нутгудт бәәдг нег һазра улс бас эн кергт демән күргҗәнә. Шидр Америкд бәәдг Армана Цаһан өрк-бүлиннь нерн деерәс 7 миңһн арслң өгүлв. Бар сарин 28-д темдглгддг хальмг улсин санлын өдр угтҗ зәрм өрк-бүлмүд эк-эцкнриннь санл тевчҗ хурлын тосхлтд демән бас орулв. Тедү мет «Сухотинский» эдл-ахуд олн җилдән көдлҗ йовсн Эрднь Хулхачиевич болн Цаһан Болдыревна Бадмаевихнә Кема күүкнь 12 миңһн арслң, Һашун Бурһст селәнд урднь бәәсн Дорҗ Сангаджиевич болн Ляля Бадмаевна Хюсеевихнә күүкднь 5 миңһн арслң орулв. Дорҗ Сангаджиевич «Обильный» совхозд дааврта үүлд көдлҗ йовсмн, селәнә бәәрн улс эндр өдр күртл терүг бүләнәр тодлна.
Хулһн сарин 14-д хурлын ул тосхлһна көдлмш эклв. Батман Лерикин бригад намрин дулан өдрмүд олзлҗ көдлмшән дигтә-даратаһар күцәхәр шунв. Эн көдлмшт дөрвн дундур сай арслң олзлхар зуралгдҗасн билә, зуг буйнч секдлтә кергт дөң-тусан күргсн улс тосхлтын материалмуд йилһҗ өгснә ашт 1 сай 257 миңһн арслң һарһгдв. Зәрм улс шишлң көлгн-күч йилһҗ өгч, бас дөңгән күргв. Көтчнрә района муниципальн бүрдәцин толһач Һооҗура Санл болн бүрдәмҗин комитетин ахлач Шарапа Геннадий тосхлтын көдлмшин йовудыг бүрткҗ, терүнд орлцсн тосхачнрт ханлтан өргв. Ода деерән тосхлтын көдлмш хавр күртл хооран саагдсн бәәнә. Болв хурл босххин төлә нань чигн керг кех кергтә болҗана. Бүрдәмҗин комитетин гешүд Амуна Тогтн, Кокан Михаил болн Мацга Татьяна хурлын төлә әрүн тоот хураҗ белдлһнә көдлмш кех дааврта. Тегәд эднә һардврт ода цаца келһнә көдлмш бүрдәгдсн бәәнә. Шин Мөр селәнә Цаһан булгин өөр дотл (цаһан шавр) цуглулҗ әмтн цаца кеҗәнә. Татьяна Сергеевнан келсәр, үкр сарин 23-д Көтчнр селәнә медәтнр Мутлан Николай болн Цеевин Алексей түрүн цаца кев. Района әмтн цаца келһнә әрүн кергт шунмһаһар орлцҗ, эврә тәвцән орулҗана, эннь эднд ик буйн болхнь лавта. Цацаг адһм угаһар, седклән тәвҗ, цевр уха-тоолвр санҗ кех кергтә, – гиҗ Татьяна Сергеевна келв. Ут тоодан 10 миңһн цаца кех кергтә болҗана. Хөөннь номта цаас эргүлҗ белдх, хавртан болхла буурлда цуглулҗ хагсаһад бас хурлын әрүн тоот белдхмн.
Көтчнрт хурл бәрх төр кесгәс нааран босхгдҗала. Келхд, терүг тосхх һазриг XIV Дала ламин гегән зааҗ өгсмн. Намрар энд һазр әрүсллһнә йосрхл күцәсн Хальмгин шаҗн лам «Бурхн Багшин Алтн сүм» төвин хурлын һардвр тосхлтд 500 миңһн арслңга дем күргҗәхин тускар келсн билә. Дәкәд шаҗн лам шин хурлын улд углҗ тәвх әрүн олн һазрас авч ирсн шавр болн нань чигн шаҗна тоот белглв.
Давсн җил шар шаҗнд сүзглдг улсин нарт-делкән ниицәнә шиидврәр XIV Дала ламин гегәнә 85 җилин өөнд нерәдҗ, мана Багшт ханлт өрглһнә җил зарлгдсн билә. Тегәд Көтчнр селәнд хурлын тосхлт тер ончта җилд эклснь темдгтә йовдл болҗана.
Хурлын тосхлтыг эн җилин чилгч күртл төгсәх зура бәәнә, гиҗ бүрдәмҗин комитетин гешүд келв.
ДАВАН Наталья
ЗУРГТ: Көтчнрә медәтнр Мутлан Николай болн Цеевин Алексей түрүн цаца кеҗәх кем

Видео