Эн сойлын төв нурҗана

30-01-2021, 07:33 | Таңһчин зәңгс » Зіњг

Элст балһснд «Родина» нертә сойлын цутхлң нурҗана. Келхд, эн гер цуг хальмгудын төлә тууҗлгч чинртә. 1943-ч җилин бар сарин 28-д минь тенд хар гөрәр урвачнрт зарлгдсн хальмгудыг күчәр цуглулад, тендәс Сиврүр авад һарла.
Дәәнә өмн урн тосхач В. Калмыковин төсвәр тосхгдсн эн гер 1938-ч җилин үкр сарин 15-д байрта бәәдлд эдлврт орулгдсмн. «Родина» кинотеатр давсн зун җилин 30-ч җилмүдин хойрдгч өрәлд балһсна хамгин сәәхн герт тоолгдла, терүнә эрсиг зурач Владимир Фаворскийин зургуд кеерүлҗәлә, герин ора деер көдлмшч болн спортсменкин бумбс углгдсмн.
Төрскән харсгч Алдр дәәнә кемд, 1942-ч җилд, Элстәс гүүҗ йовсн немшнр герин эргнд мин тәвәд терүг хаһлҗ күүчхәр седсмн. Болв советск сапермудын нилчәр «Родина» кинотеатр бүрн-бүтн үлдсн болдг.
1961-ч җилд «Родина» кинотеатр» нертә СССР-ин поштын марк барас һарла. 1965-ч җиләс авн 1982-ч җил күртл кинотеатрин һардачар Советск Союзин Герой Басңга Баатр көдлсмн. 1995-ч җилд кинотеатрин ул деер ветеранмудын Гер секгдлә.
2001-ч җилин така сард ветеранмудын Гер «Родина» нертә сойлын цутхлңд хүврсмн. 2009-ч җилин хөн сарин 7-д Хальмг Таңһчин Улсин Хуралын (Парламентин) тогтаврас иштә «Родина» сойлын цутхлңгин Гер таңһчин сойлын шишлң зөөрин объектсин тоод орулгдсмн. Тегәд чигн «Родина» нертә сойлын цутхлңгин Гер архитектурн бумб болҗ тоолгдҗана.
Харм төрхд, тууҗлгч чинртә эн Гер ода нурад, әәмшгтә бәәдл тогтв.

ШААКУН Василий

Эн сойлын төв нурҗана
Эн сойлын төв нурҗана

Видео