Хальмг келнд дурта улсиг негдүлхәр

30-01-2021, 08:00 | Таңһчин зәңгс » Зіњг

Элст балһснд сул цаган сәәнәр давулдг арһ уга гидг төр дару-дарунь соңсгдна. Миниһәр, энүнә туск күр айстан босхсн төр биш. Эн төр лавта бәәнә, тегәд энүг хаһлх кергтә.

Одахн мини таньл, зурач болн шүлгч үүрмүдтәһән харһад, теднд эврәннь үүдәврмүдән үзүлхәр, энүнә тускар нәәҗнриннь ухан-тоолвринь соңсхар Элст балһсна нег кафед харһий гиҗ теднән дуудв. Үүрмүднь зөвәр олар ирв. Үүдәгч асхни бүрдәһәч йир байртаһар гиичнрән тосв. Керг-үүлдврт ирсн улст эн шин шүлгүдәсн умшад, сүл зургудан үзүләд, орлцачнрин кесг сурврмудт тодрха хәрү өгв. Харһлт соньнар давв, болв нег тоот эс харшлсн болхла, үүдәгч асхн улм сәәнәр давхмн билә. Яһад гихлә кафед болн ресторанмудт, нег үлү асхар, олн әмтн үүрмүдтәһән аль элгн-садтаһан амрхар, өөнән темдглхәр цуглрна. Тегәд тедн үүдәгч асхнд ирсн улст харш болхнь маһд уга, юңгад гихлә эдн чаңһар күүндәд, гош-гош гиҗ инәлдәд, дууллдад, хәәкрн гилтә шуугатаһар бииләд, эврәннь үүдәлтин тускар келҗәсн мини таньлдм икәр харшлв. Тегәд эн туст ямаран ашлвр кеҗ болхмн? Кафе болн ресторанмудт үүдәгч асхд кеҗ болшго. Энүнә төлә кемҗәһәрн баһ болвчн шууган уга бәәрн кергтәнь лавта.
Келхд, тиим бәәрнд һанцхн үүдәгч асхн биш оңдан чигн учр-утхта керг-үүлдвр давулҗ болхмн. Үлгүрнь, хальмг келнд дурта улсин клуб чигн бүрдәҗ болхмн билә. Үнәртнь келхлә, балһснд тиим клубмуд бүрдәлһнә тускар би кесгәс нааран ухалҗанав. Тегәд эн күслән ямаран кевәр бәәдл-җирһлд тохрахин тускар ухан-тоолврарн хувалцхар бәәнәв.
Клубин баг болһнд, мини сансар, арвн шаху күн дасх зөвтә. Келхд, тиим клуб мана балһснд бәәсн болхла би тиигәрән эврәннь отхн күүкән дахулҗ ирәд, цацу наста баһчудла таньлдулад, клубин үүлдврт орлцулхмн биләв.
Әмтн тиигәрән ирхнь маһд уга. Яһад гихлә өдгә цагт келән медхәр бәәх әмтн дала, нег үлү баһчуд дунд мөн. “Болв ода “Бурхн багшин алтн сүмд” хальмг келнә кичәлмүд давналм”, – гиҗ зәрмнь келх чигн биз. Э, мел чик. Зуг хальмг келнд дурта улсин клубин үүлдврин диг-дараг хурлд болҗасн кичәлмүдәс оңданар кех кергтә гиҗ нанд сангдна. Хурлд хальмг келнә кичәлмүд дунд сурһульд мет давулгдна, тенд багш болн сурһульчнр эрк биш бәәнә. Клубд орлцачнр болхла, мини тоолврар, оңдан эв-арһар харһлтан давулх зөвтә. Тиим эв-арһс болхла дала. Үлгүрнь, клубд орлцачнр “Өрк-бүл”, “Лавкд”, “Уульнцд” болн нань чигн наадд бүрдәһәд терүнд орлцхла тус болхнь маһд уга. Зәрмнь «келән мууһар меднәв» гиһәд эмәһәд чигн бәәх биз. “Әәх юмн уга, мууһар чигн, өрәл-дөрвнәр чигн, талт-мултар чигн келҗ үзтн, бидн таанрт заахвидн. Зуг өдр болһн төрскн келәрн күүндәд бәәхлә, хальмг келән дасхит”, – гиҗ клубин һардач тедниг дөңнхлә, әмтн урмд авад улм шунмһа кевәр келән дасхнь лавта. Клубин гешүд дунд олн зүсн төрәр күр бүрдәдмн. Үлгүрнь, малын, көдлмшин, эрдмин болн нань чигн төрмүдин тускар күүндҗ болхмн. Миниһәр, клуб долан хонгт хойр-һурвн дәкҗ көдлхлә, сән болхмн билә.
Клубин баг хойр-һурвн әңгд хувагдад, эврә келән меддг кемҗәһәрн йилһгдх зөвтә гиҗ санҗанав.
Сурһуль улм соньн болтха гиһәд бәәҗ-бәәҗәһәд хальмг келән сәәнәр меддг номтнриг, артистнриг, спортсменмүдиг, бичәчнриг болн нань чигн нертә улсиг дуудад, бас олн зүсн төрәр күүндвр тогтахла, улм сән болх гиҗ сангдна.
БЕМБИН Очр

Видео