Шин премьер-министр батлгдв

04-02-2021, 16:58 | Таңһчин зәңгс » Зіњг

Моңһлын правительствиг политическ шин һардач Оюун-Эрдэнэ толһалв. 2021-ч җилин туула сарин 27-д Оюун -Эрдэнэ Лувсаннамсрай премьер-министрин үүлд батлгдв. Улсин Хуралын депутатнрин 87 процентнь шин һардачин төлә дууһан өгв.

Коронавирус гемәс әмтиг гетлгх вакцинациг түргәр кеҗ, эн туст тохнята болн тоолврта көдлмш кеҗ, моңһлчудын эрүл-мендинь батлхар бәәхән шин премьер-министр медүлв. Эн пандемийин бәәдлиг диилҗ, төвшүн делгрлтин хаалһд орхла, экономик чигн ясрхмн, гиҗ эн тоолҗана. Эркн чинртә төрмүдиг хаһлсна дару цифровой делгрлтин министерств бүрдәхәр Оюуни Эрдэнэ медүлв.
Дәкәд болхла Моңһлд темдгтә Оюун Толгой уурхан тускар Моңһл болн Рио Тинто хоорнд кегдсн зөвшәлиг дөңнлго бәәхинь орн-нутгин әмтн меднә. Экономическ халхар чигн шинрлт болх гиҗ күләгдҗәнә.
Премьер-министр правительствд орҗах министрмүдин өрәлинь гилтә сольв. Зуг нәәмн министр урдк үүлдән үлдв. Моңһлын тууҗд түрүн болҗ правительствин ханьд дөрвн күүкд күн орв. Теднәс һурвнь политикд учрсн төрүц шин нерд болҗана. Өөр-эргндк йиртмҗиг харлһна болн туризмин министр – Н. Уртнасан, һазадын кергүдин министр – Б. Батцэцэг, күч-көлснә болн социальн харслтын министр – А. Ариунзаяа, сойлын министр - Ч.Номин болв.
Премьер-министр Оюун-Эрдэнэ селән һазрт өсҗ-боссмн. Һазадын орнд ик сурһуль сурсмн. Гарвардск ик сурһулин Кеннедин нертә залврин Школыг төгсәһәд, государственн политикин магистр эрдмтә болсмн.
Моңһлын министрмүдин кабинетд ах сегләтр болҗ көдлҗәхдән 2050-ч җил күртл Моңһлын стратегическ делгрлтин зура белдлһнд шунлттаһар үүлдсмн. Делгрлтин удан болзгта эн бәрмтә цааснд Моңһлын өвәрц тоот болн Сингапурин, Эстоня болн нань чигн нутгудын дамшлт олзлгдсиг мергҗлтнр үнлҗәнә.
Моңһлын правительствд болсн шинрлтсин йовудт шин үйин политикүд йосна һардврт ирҗәнә гиҗ үнлҗәнә. Дәкәд болхла урдк политическ һардврас йилһрхләрн эдн деед үзгин нутгудт ик сурһуль дассн, демократическ системлә болн ниигмлә таньлдсн, талдан хәләцтә улс болҗана. Орн-нутган политическ болн экономическ халхар бат орн-нутгудын тоод орулх күслтә политикүд болҗана. Советин Союзд сурһуль сурсн, демократическ хүвсхлд (1990) орлцсн политикүдәс хольҗҗах ишкдл кегдҗәнә гисн тоолвр бәәнә.

Видео