Хаалһс әәмшг уга болх зөвтә

06-02-2021, 13:31 | Таңһчин зәңгс » Зіњг

Хальмг Таңһчин Толһач Хаска Бату көлгн-күчнә халхд бүртклһнә федеральн цергллтин (Ространснадзор) һардач Виктор Басаргинла харһв. Дааврта һардач мана таңһчур көдлмшин кергәр ирв. Харһлтд хаалһин җисәнә әәмшг уга бәәдлин болн автомобильн хаалһсиг хадһллһна төрмүд хәләгдв. Эн төрмүдиг көлгн-күчнә-логистическ комплексин делгрлтин төлә учртан авх кергтә гиҗ таңһчин толһач темдглв.
Урдк җилмүдлә дүңцүлхлә Хальмг Таңһчд автомобильн хаалһс хадһллһиг тетклһнә халхд сән күцәмҗ бәәнә гиҗ харһлтын йовудт Виктор Басаргин келв. «Эн туст аһу ик көдлмш күцәгдв. Болв кех-күцәх керг ода чигн дала»,- гиҗ таңһчин Толһач немв.
Ода таңһчд техническ ул ясруллһна туст көдлмш күцәгдҗәнә. Хальмг Таңһч болн Ространснадзорин автомобильн хаалһин шаңһа бүртклһнә Өмн Үзгин регионмуд хоорндк заллтын һардвр хоорнд хамцу үүлдврин ашт күнд аца зөөдг көлгн-күчнә бүртклһн кегднә. Яшкуль-Арзгир- Минеральные Воды хаалһд «Яшкуль» гидг болн Элст-Арзгир-Минеральные Воды хаалһд «Лола» стационарн пунктст бүртклһнә талвңд болн чиңнүр дор хату девскр кегдв. Эннь давсн җилд кесг дуту-дунд йилһҗ авхд туслв.
2021-ч җилд «Әәмшг уга болн сән чинртә хаалһс» гидг келн-улсин төсвин медлд бүртклһнә керг-үүлдврмүд давулхин төлә чиңнүрин бүртклһнә һурвн автоматическ пункт углҗ тәвгдхмн гиҗ зуралгдҗана. Тер мет олн көлгн-күчн йовдг хаалһст регионмуд хоорнд аца зөөлһнә туст бүртклһнә керг-үүлдврмүд давулгдхмн.
Харһлтд көлгн-күчнә теткврин, тер тоод олна көлгн-күчәр әмтиг зөөлһнә систем ясруллһна төр бас босхгдв. Эннь көлгн-күчнә туслмҗ күргдг арһлачнрт лицензь өглһнә болн эрк биш некврмүдлә ирлцҗәх бүртклһн болна. Дәкәд зогсалмудыг тосхлһна болн җолачнр амрхин төлә сән таал тогталһна төрмүд бас хәләгдв.
«Күнд аца зөөдг көлгн-күчнә бүртклһнә керг-үүлдврмүд бүрдәлһиг ясрулх кергтә. Ространснадзорин некврмүдиг учртан авч таңһчин хаалһст бәәрн улсин болн гиичнрин төлә әәмшг уга бәәдл болн сән таал тогталһна туст көдлмшән шунмһадулх кергтә. Виктор Федорович байн дамшлтта болн өөдән мергҗлттә күн, тегәд эн чинртә төрмүд хаһлхин туст хамцу үүлдхин тускар үгцвидн», - гиҗ Хаска Бату темдглв.

Барт белдснь ДООҖАН Наталья

Видео