Медәтнр шин эрдм дасв

06-02-2021, 13:41 | Таңһчин зәңгс » Зіњг

Хальмг Таңһчин социальн делгрлтин, күч-көлснә болн көдлмшәр тетклһнә министерств «Демографь» гидг келн-улсин төсвин медлд «Ах үй» гидг региональн көтлвр белдв. Эн көтлврт ах үйин улсин бәәдл-җирһлин таал ясруллһна болн эднд дөң күрглһнә керг-үүлдврмүд батлгдсн бәәнә. Тер тоод медәтнрин мергҗлт өөдлүллһнә төр бас хаһлгдҗана.

Давсн җилд эн көтлврәр мана таңһчд тәв һарсн болн удл уга пенсьт һарх 141 күн мергҗлтән өөдлүлҗ шин эрдм дасв. Ода теднәс 134 күн шин эрдмәрн көдлмш олҗ авсн бәәнә. Тегәд сурһуль сурсн улсас 98,5 процентнь көдлмшәр теткгдв. Темдглхәс, эн көтлврт предприять-бүрдәцсин көдләчнр болн көдлмшәр тетклһнә цергллтд бийснь ирсн улс орлцҗ чадҗана. «Ах үй» гидг региональн көтлврин керг-үүлдврмүд бүрдәлһнд 3354,49 миңһн арслң йилһгдв, терүнәснь 3287,4 миңһн арслң федеральн бюджетәс, наадк 67,09 миңһн арслңг - таңһчин бюджетәс. 2020-ч җилин эклцәс авн таңһчин медәтнрин мергҗлт өөдлүллһнә керг-үүлдврт ик болн дунд шишлң сурһуль-эрдмин 14 бүрдәц орлцв.
Ах үйин улс олн халхар шин эрдм дасв гиҗ темдглх кергтә. Тиигәд, эдн шаңһа муниципальн залвр, малын эмч, күч-көлс харлһн, социальн көдләч, тооч, түрүн медико-санитарн дөң күрглһн болн нань чигн эрдм дасв.

Видео