Әмтиг соньмсулх керг-үүлдвр

11-02-2021, 16:13 | Таңһчин зәңгс » Зіњг

Шидр Ипподромин нертә уульнцд «Теңгр» гидг цергә-тууҗин клубин өдр болв. Эн маш соньрхлта керг-үүлдврин йовудт клубд орлцачнр цуглрсн улсиг кеҗәх көдлмшләрн таньлдулв.


Ипподромин хаҗуд бәәдг селәнә эдл-ахун һәәхүлин төвин өмн задһа талвң деер «Теңгр» клубд орлцачнрин кегдлмүдин һәәхүл үзүлгдәд, олн-әмтнә оньг авлв. Энд мана хол өвкнр керглҗ йовсн үлд, хуйг, дуулх чигн үзҗ болхмн билә. Ирсн көгшн-баһ уга һәәхүлиг ик гидгәр соньрхад хәләцхәв.
«Теңгр» клубд ода деерән хөр шаху гешүн орна. Бас Элст балһсна дунд сурһульмудт (школмудт) сурчах бичкдүд клубд ирәд үлдәр чавчдган дасна. Эн өдр 23-ч тойгта дунд сурһулин көвүд-күүкд чавчлдлһна мастер-класс үзүлсмн. Сурһульчнриг дамшач, кендо тәмрин (спортын) багш Евгений Антонов һардҗ ирв. «Теңгрин» һардач, дархн Очр-Аран Эрднь төмр давтлһна дамшлтарн хувалцв. Хальмг сойлын зүткәч Мазна Алексей соньмсчах улст арс идәлһнә тускар келҗ өгв. Эн керг-үүлдврт нань чигн олна бүрдәцс орлцла: «Ар үзг» баһчудын тәмрин бүрдәц, «KHUYAG» хувц-хунрин делгүр болн «Нутг» гидг олна бүрдәц мөн.
Хальмгин нертә шогч Санан Уруджаев, зург цокач Виталий Катышкин болн нань чигн блогермүд чигн олар ирсн билә.
Очр-Аран Эрднь төмр давтад, селм, утх яһҗ кеҗ һарһдган үзүлв. Келхд, күн болһн алх авад, эврә һарарн төмр давтҗ үзв. Әрәсәд нер туурсн «Темәнә арл» нерәдлһтә ютуб-цувгин (ютуб-каналын) блогер Очр-Һәрән Леонид төмр давтҗ үзх дуран медүләд, Эрдньд утх кеҗ һарһхд туслв.
«Эндр салькн уга йир дулан өдр. Тегәд тиим сәәхн өдрлә олн-әмтиг дуудад, иим керг-үүлдвр давулх шиидвр авлавидн. Мана кесн кегдлмүдин бичкн һәәхүл үзүлвидн. Энд лавшг, хуйг, идәлсн арсн, модар, төмрәр чигн кесн олн кегдлмүд әмтн үзҗ чадв. Цуг эн юмиг мана орлцачнр эврә һарарн кесмн. Керг-үүлдврин йовудт би утх, селм болн дуулх кеҗ үзүлүв», – гиҗ Очр-Аран Эрднь келсн болдг.
Шидр теңгрин бәәдл мадниг дулан өдрмүдәр байрлулсн билә. Ода болхла дәкн киитрсмн. Зуг удл уга хавр ирәд, йиртмҗ серәд, олн-әмтиг дулалхмн. Тер цагт «Теңгр» цергә-тууҗин клуб бас олн соньн керг-үүлдврмүдән давулад бәәх.

МАНҖИН Санл

Видео