Шин бүүрнь өлзәтә болтха!

16-02-2021, 14:15 | Таңһчин зәңгс » Зіњг

Цаһан Сарин өмн өргнд Элст балһснд Некрасовин нертә уульнцд 33-ч тойгта шин гер байрин таалд секгдв. Эн объект «Гер-бүүр болн балһсна таал» гидг келн-улсин төсвин аварийн гермүдәс әмтиг нүүлһҗ авлһна көтлврәр тосхгдсмн. Эн герин тосхлт Элст балһсна болн Хальмг Таңһчин һардврин һол оньгт бәәсмн, энүг сән чинртәһәр болн батлгдсн цаг-болзгтнь эдлврт орулхиг чаңһ кевәр бүртксн билә.

Шидр Әрәсән тосхлтын болн ЖКХ-н министр Ирек Файзуллин мана таңһчур көдлмшин кергәр ирхләрн эн гериг одҗ хәләһәд, тосхлтын көдлмш өөдән чинртәһәр кегдсиг темдглв. Эн герин тосхлтд олзлгдсн 43 сай арслң федеральн бюджетәс ЖКХ-н саңгин халхар йилһгдсмн, таңһчин болн балһсна бюджет бас орлцсмн. Энд балсһсна 3-ч микрорайона 5-ч тойгта герт урднь бәәсн 26 өрк-бүл шин бүүртә болв. Тер аварийн герт ода чигн бәәдг улсин төлә өөрхн хойр җилин эргцд шин гермүд бас тосхгдхмн. Тегәд 2017 җил күртл аварийн чинр зүүсн гермүдәс әмтиг нүүлһҗ авлһна көтлвр цаг-болзгаснь урд төгсхмн гиҗ күләгдҗәнә. Шидр ЖКХ-н шинрлтд тусллһна саңгин правлень аварийн гермүдәс әмтиг нүүлһҗ авлһна көтлвриг бәәдл-җирһлд тохралһиг шунмһадуллһна Хальмг Таңһчин эрлһиг дөңнв. Тиигәд, саңгин шиидврәр мана таңһчд 2021-2022 җилмүдт 114,97 сай арслң йилһгдхмн.
Шин гер-бүүрин түлкүр авсн өрк-бүлмүдиг Элст балһсна толһач - Элст балһсна Хургин Ахлач Орзан Николай, хотл балһсна администрацин толһачин дарук Васькина Галина, Элстин администрацин аппаратын һардач Дорҗ-Һәрән Эльзя, «Геола» гидг тосхлтын бүрдәцин элч Босчан Санҗ болн нань чигн улс йөрәв. Цаһан Сарин өмн өргнд шин бүүрт орҗахнь хойр дам байрта болҗана гиҗ күндтә гиичнр темдглҗ, патьрнь өлзәтә болтха гиҗ дурдв. Хуучрад нурҗах аварийн герт бәәсн улс эн гер тосхгдхиг теңкән уга күләҗәсмн. Тегәд хальмг улсин дурта Цаһан сарин байрла шин патьртан орҗахнь эднә җирһл сән талагшан хүврх гисн ицл өгчәнә. Цуһар олн җилдән хөвтә-кишгтә җирһл эдлҗ сән-сәәхн бәәтн гиҗ йөрәлин үгдән гиичнр келв.
Хуучн гермүдәс нүүҗ өдгә цага сарул патьрта болсн улс региональн болн балһсна һардвр эднә төрт орлцснд ханлтан өргҗ, таңһчин Толһач Хаска Бату болн Элстин администрацин толһач Дмитрий Трапезников тосхлтын йовудыг бийснь бүрткдг бәәсиг темдглв. Шин патьрмудт орҗ бәәхин төлә цуг таал тогтагдсн бәәнә. Патьр болһн ус халулдг автономн системар, газин приборар, сантехническ кергсләр теткгдв, энд хорас хоорндк үүдд углҗ тәвгдв. Тер мет герин эргндк һазрт бас сән таал тогтаҗ, көлгнә-күчнә зогсал, бичкдүдин талвң, хувц-хунр хагсадг шишлң орм тосхв. Шин герәс хол биш олна көлгнә зогсал бәәнә. Темдглхәс, эн җилин чилгч күртл эн районд аварийн гермүдт бәәдг улсин төлә дәкәд шин гермүд тосхгдхмн.
ДООҖАН Наталья

Видео