Селән һазрт көдлхиг урмдулхар

18-02-2021, 14:31 | Таңһчин зәңгс » Эрўл-менд харлһн

Хальмг Таңһчд «Земск доктор/земск фельдшер» гидг көтлврт орлцҗ чадх эрүл-менд харлһна көдләчнрин то-диг икдүлгдв. Ода селән һазрт көдлхәр ирсн эмчнрлә болн фельдшермудла зерглҗ ФАП-мудын медсестрас болн акушеркс демин мөңг авх зөвтә болв. Эннь таңһчин эрүл-менд харлһна министерствин седвәрәр Хальмг Таңһчин правительствин тогтаврт батлгдв.
«Земск доктор/земск фельдшер» гидг көтлвр мана таңһчд күцәмҗтәһәр бәәдл-җирһлд тохрагдҗана. Терүнд орлцҗ района эмнлһнд эс гиҗ селәнә ФАП-д көдлхәр ирсн эрүл-менд харлһна көдләчнр нег дәкҗ демин мөңг авна. Тиигәд Троицк селәнд, Лагань болн Городовиковск балһсдт эмнлһнә бүрдәцст көдлхәр ирсн эмчнр 1 сай арслңга, дунд медицинск көдләчнр болхла 500 миңһн арслңга демин мөңг авхмн. Наадк райодын эмнлһнә бүрдәцст көдлхәр ирсн эмчнр 1,5 сай арслң, ФАП-ин фельдшер, акушерк болн медсестра 750 миңһн арслң авч чадхмн.
Тер мет селән һазрт көдлхәр ирсн эрүл-менд харлһна көдләчнрт гер-бүүр нәәмәдлҗ авлһна һаруг даңцалһнд региональн шаңһас сар болһн 2 миңһн арслң йилһгднә. Таңһчин эрүл-менд харлһна министерств эн көтлврт орлцх көдләчнрт үрвр кеҗәнә. Ямаран селәдин эмнлһст көдлҗ болхин тускар таңһчин эрүл-менд харлһна министерствин сайтд барлгдсн зәңгәс медж болхмн.
Мана зәңгч

Видео