Эрүл-менд харлһна халхиг делгрүлх күслтә

Сегодня, 12:25 | Общество, Таңһчин зәңгс, Зіњг, Эрўл-менд харлһн

Ноха сарин 14-д Хальмг Таңһчин Толһач Хаска Батун зәрлгәс иштә Хальмгин эрүл-менд харлһна министрин үүлиг Мушаран Арслң даадг болв. Тер өдр таңһчин залврин Ахлач Босхмҗин Гилән шин һардачиг министерствин көдләчнрлә таньлдулв.
Мушаран Арслң Хар Һазра района Комсомольский селәнд өсч-босв. Тенд Басңга Баатрин нертә гимназь төгсәһәд, хөөннь Әәдрхнә медицинск академьд сурад, 2011 җилд хату цаасан авсмн. Дарунь Санкт-Петербург балһсна И.И.Джанелидзен нертә түрүн дөң күрглһнә номин-шинҗллтин күрәлңд ординатурин халхар дамшлтан хоршав. 2014 җиләс авн долан җилдән тенд көдләд, төрскн таңһчдан ирв. Элстд Хальмгин эрүл-менд харлһна министерствин ах хирург болн гүлгн гемин эмч болҗ көдләд, дарунь ирлцңгү диспансерин ах эмчин дарукд батлгдсн билә.
Онц темдглхәс, Арслң Владимирович цергә шишлң керг-үүлдвр давҗадг һазрт бас көдлв. Түрүн болҗ дамшлтта эмчнр Башанкан Бадмла болн Манҗин Санлта хамдан тиигәрән одсн билә.
Сүл хойр җилин туршарт Әрәсән харслтын Министерствин медлд бәәдг С.М.Кировин нертә цергә-теңгсин эмнлһнд гүлгн гемин эмчәр көдлсмн. Көдлмшән үнн-чик седклтәһәр күцәдг төләдән кесг ачлврмудар темдглгдсн билә. Тер дунд Әрәсән Президентин, ДНР-ин Толһачин Күндллһнә һашгудар, Әрәсән эрүл-менд харлһна Министерствин Ханлтын бичгәр, «Туурумҗин төлә» медаляр, Донецк Улсин Республикд ач-тусан күргәд, һурвдгч девсңгин темдгәр бас ачлгдсн болдг.
Залврин Ахлач Босхмҗин Гиләнә келсәр, баахн эмч цергә шишлң керг-үүлдврин йовудт болн орн-нутгин талдан балһсдт хоршасн дамшлтан олзлад, эрүл-менд харлһна министерствиг һардад,эмчнрин болн гемтә улсин төрмүдиг хаһлад, көдлмшән чадмгар бүрдәҗ чадхинь иткҗәхән медүлв.
– Сүл цагт эрүл-менд харлһна халхар олн зүсн чинртә төсвс күцәгдҗәнә. Таңһчин Толһач Хаска Бату эрүл-менд харлһна халхар тәвсн төрмүдиг, тер дотр кадрмудын төр бас хаһлхвидн. Селәнә һазрт онц оньган тусхах кергтә, – гиҗ Гилән Герасимовна темдглв.
Харһлтын йовудт Босхмҗин Гилән шин һардачд күцәмҗ дурдад, урднь министрәр үүлдҗәсн Саран Булатд ханлтан өргәд, бүлән үгән нерәдв.
Мушаран Арслң энүнд өөдән үүл даалһснд таңһчин һардврт ханлтан өргәд, көдлмшән седклән тәвҗ күцәхән иткүлв.

Белдснь КАРСАНА Евгения

Тоолвр
Эрүл-менд харлһна халхиг делгрүлх күслтә
Э.Тимошкаеван нертә гүлгн гемәс хөрлһнә таңһчин диспансерин ах эмч Муутла Земфира:
- Мушаран Арслңла хамдан бидн кесг җилдән көдлвидн. Мана бүрдәцд гүлгн гемин эмч болад, даруһас ах эмчин дарукд батлгдсн билә. Энүн тал ирсн күн болһнд оньган өгч, кесг улст геминь илдкәд, ирлцңгү эмнлһ цаг-болзгтнь күцәв.
Цергә шишлң керг-үүлдвр давҗадг һазрт олн дәәчнрин әминь аврсинь онц темдглх кергтә. Дәәнә таалд месллһ кенә гидгнь амр керг биш. Госпитальд көдләд, шавтсн олн дәәчнрт бас туслв.
Дамшлтта эмч болсн деерән Арслң Владимирович цаһан седклтә, тевчңгү, һольшг, дааврта, олн-әмтнлә ээлтә күн болна. Эндр таңһчин эрүл-менд харлһна халхар олн төрмүд хаһлх кергтә. Баахн һардач цугинь даавртаһар күцәҗ чадхинь итклтә бәәнәв.

Эрүл-менд харлһна халхиг делгрүлх күслтә
Лаганя района эмнлһнә ах эмч Шарапа Николай:
- Арслң Владимирович дамшлтта хирург, энүнлә хамдан көдлсн биләвидн. Сән заңта, цаһан седклтә эмч болна. Тер мет цергә шишлң керг-үүлдвр давҗадг һазрт көдлснь эн зөргтә күн болҗахиг иткүлнә. Хоршасн дамшлтан олзлад, таңһчин эрүл-менд харлһна халхиг цааранднь делгрүлҗ чадхмн, гиҗ ицҗәнәв.

Эрүл-менд харлһна халхиг делгрүлх күслтә
П.Жемчуевин нертә таңһчин эмнлһнә ах эмч Чумпинә Саглр:
- Мушаран Арслң таңһчин эрүл-менд харлһна министерствин ах хирургар көдлсн цагт бидн залһлда бәрҗ көдлвидн. Цергә шишлң керг-үүлдвр давҗадг һазрт одх шиидвр авхлань бидн дөңнләвидн. Ода Арслң Владимирович эрүл-менд харлһна халхин делгрлтд ач-тусан күргәд, седклән тәвҗ көдлхән медүлв. Энүнд күцәмҗ болн цаһан хаалһ дурдҗанав!

Эрүл-менд харлһна халхиг делгрүлх күслтә
Э.Тимошкаеван нертә гүлгн гемәс хөрлһнә таңһчин диспансерин эмч Демкинә Арслң:
- Мушаран Арслңла хамдан бидн кесг месллһ кеввидн. Өдгә цагин некврлә ирлцдг эмнлһ күцәһәд, күндәр гемтә улст эн өдр-сө уга онц килмҗән тусхадмн. Гүлгн гемин эмнлһнә халхар шин эв-арһ олзлад, олн-әмтнә әм аврв. Келсн үгдән күрдг йоста залу мөн. Таңһчин эрүл-менд харлһна бүрдәцст көдлҗәдг мергҗлтнр шин һардачиг эрк биш дөңнхнь лавта.

Видео