Өөдән чинртә дөң күргхәр

02-03-2021, 14:04 | Таңһчин зәңгс » Эрўл-менд харлһн

Шидр мана таңһчур А.Бакулевин нертә зүркнә-судцна Келн-улсин медицинск шинҗллтин төвин эмчнр ирсн билә. Эдн П.Жемчуевин нертә таңһчин эмнлһнә улд ода стационарт эмнлһ авчах улсин эрүл-мендин бәәдл шинҗлв. Терүнә ашар эмчнр өөдән чинртә месллһ керглҗәх улсиг шүүҗ авв.

- Давсн җилин намрар бидн танаһур ирсн биләвидн. Бәәрн улсин шинҗллт кеснә ашар таңһчин улст зүркнднь месллһн кегдв. Мана орн-нутгт бөдүн улст дөң күргдг кардиологическ төв дала, зуг бичкдүдин төлә тиим эмнлһс баһ болна. Тегәд ода маднла хамдан бичкдүдин кардиологуд бас ирснь темдгтә. Одахн мана төвд Әрәсән эрүл-менд харлһна министр Михаил Мурашкола харһлт болв. Тегәд терүнд әмтнд урдаснь зуралгдсн медицинск дөң күрглһнә үүлдвриг бүрдәхин тускар күүндвр һарв. Медицинск бүрдәцс урдк кевәрн үүлдврән бүрдәҗ көдлх зөвтә. Бидн эн халхар үүлдврән бүрдәҗәнәвидн, - гиҗ А.Бакулевин нертә НМИЦ-ин әңгин һардач, медицинск номин доктор Владимир Мироненко келв.
Эн медицинск төв җил болһн 15 миңһн күүнә эрүл-мендин бәәдл шинҗлнә, 5 миңһн һар месллһ кенә. Федеральн төвин эмчнрин келсәр, Хальмгт коронарн, брахиоцефальн, церебральн судцна, көл-һарин судцна шинҗллт өөдән кемҗәнд кенә. Хальмгин эмчнр зүркнә-судцна гемтә улст нарт-делкән кемҗәлә ирлцдг дөң күргнә. А.Бакулевин нертә медицинск төв зүркнә-судцна күнд гемтә улст туслмҗ күргнә.
БАТАН Сәәхлә
ЗУРГТ: А.Бакулевин нертә НМИЦ-ин
болн хальмг эмчнр

Видео