Тааста керг олв

04-03-2021, 15:33 | Таңһчин зәңгс » Зіњг

Элст балһснд бәәдг Ольга Герасименко пандемий учрсн кемд көдлмш уга үлдв. Иим улст дөң болхин төлә шаңһа көтлврмүд бәәдгин тускар медәд, күүкд күн Элст балһсна әмтиг көдлмшәр тетклһнә цергллтд одв. Терүнд эн көтлврин медлд ямаран керг-үүлдврмүд күцәгддгин тускар цәәлһҗ өгәд, эврә керг бүтәҗ өглһнд дөң күргхдән белн бәәхиг медүлв.
Тиигәд Ольга Герасименко хумс эд-бод кеҗ сәәхрүлдг эрдм дасххин туст сурһулин туслмҗ күргдг керг бүтәхәр шиидв. Ольга урднь эн халхар бийнь көдлҗ йовсмн, тегәд талдан күүкд улсла дамшлтарн хувалцхар седв. Эн көдлмшәр теткдг цергллтин көдләчнрин дөң-тусар бизнес-зура белдәд, терүг күцәмҗтәһәр харсв. Терүнә хөөн энүнлә бооца батлад, керг бүтәлһнд кергтә нег дәкҗ өгдг демин мөңг йилһв. Тер мөңгәр эн кергтә эд-тавр, үүлдврин төлә кергтә кесг тоот хулдҗ авв.
- Әмтиг көдлмшәр тетклһнә цергллтин көдләчнрин дөңгәр би эврәннь керг бүтәҗ чадв. Ода би хумс эд-бод кеҗ сәәхрүлдг эрдм дасхчанав. Иим керг бүтәхин тускар би урднь санҗ йовлав. Көдлмш уга үлдсн күнд цагла шаңһа көтлвр нанд өрк-бүлән теҗәхин төлә керг бүтәлһнд туслснь байрта йовдл болв. Келхд, тааста кергм олзта-орута болҗахнь темдгтә. Пандемий учрсн цагт көдлмш уга үлдсн улст шаңһа дөң күрггдҗәхнь ик урмд өгч, цааранднь кергән делгрүлҗ үүлдхд туслҗана, – гиҗ арһлач келв.
Хальмг Таңһчин социальн делгрлтин, күч-көлснә болн көдлмшәр тетклһнә министерствин зәңглсәр, көдлмш уга үлдсн улс иим көтлврт орлцхин төлә ямаран халхд эврә керг бүтәх санан бәәхиг медх кергтә. Тер мет көдлмш уга улсин цергллтин тоод бәәх зөвтә болҗана.
БАТАН Сәәхлә
ЗУРГТ: арһлач Ольга Герасименко
дамшлтарн хувалцҗах кем

Видео