Эңкр сәәхләсиг магтҗ

11-03-2021, 15:22 | Таңһчин зәңгс » Зіњг

Күүкд улсин нарт-делкән Өдр угтҗ Көтчнрә района олн үртә экнр дунд «Дурта экм – 2021» гидг марһан болв. Эн марһан Ергенинск селәнә сойлын төвин көдләчнрин седвәрәр болн Көтчнрә района муниципальн бүрдәцин һардврин дөңгәр бүрдәгдв. Марһанд Көтчнр, Ергенинск, Һооҗур болн Алцңһуд селәдин олн үртә экнр орлцад, марһана тавн даалһвр күцәв. Тиигәд эдн бийиннь болн өрк-бүлиннь тускар келҗ өгәд, хальмг улсин хот белдх, билг-эрдмән үзүлх болн тааста кергин тускар келҗ өгх зөвтә бәәсмн. Күүкднь чигн марһанд орлцҗ эңкр экнрән дөңнв. Күүкд улс үзмҗтә видео цокҗ авад, района әмтнә оньгт терүг тусхав. Темдглхәс, эдн зуг хальмг келәр келв.

Күүкд улс болн үрднь ке-сәәхн хальмг хувц өмсәд, төрскн келәрн ду дуулад, би бииләд, хальмг улсин олн зүсн хот-хол белдҗ соньн видео цокҗ авв. Эднә күүкд сурһулян сәәнәр сурдг, олна бәәдл-җирһлд шунмһаһар орлцҗ эк-эцкиннь нериг өөдән бәрҗ йовхнь медгдв. Бийснь күүкд улс герин чимг болад, гертән күүкдтәһән зуг төрскн келәрн күүндҗ, теднд өвкнриннь авъяс, сойл зааҗ йовхнь темдгтә. Эдн цуста хот, лавшта хөөнә толһа, цуста дотр, семҗнд ораһад шарсн элк яһҗ болһдгиг үзүләд цәәлһҗ өгснь олн-әмтнд туста болв гиҗ сангдна.
Марһанд орлцачнр цуһар билгтә, өвкнриннь авъясар бәәдг, йоста хальмг күүкд улс болҗахнь медгдв, тегәд тедн дундас дииләчиг йилһҗ авхд йир күнд болв. Жюрин шиидврәр Ергенинск селәнд бәәдг олн үртә Анҗан Валентина диилвр бәрәд, Ар Кавказд амрх путевкар ачлгдв. Валентина Михаил авальтаһан дөрвн үр асрҗана. Ууһн көвүнь оютн, эн Шарту балһснд юристин эрдм дасчана. Александра болн Милана күүкднь сурһульчнр, эдн йилһән сәәнәр сурһулян сурч, олна җирһлд шунмһаһар орлцҗ, нүүрт йовна. Отхн Саяна күүкнь ода деерән бичкн, тегәд олн үртә эк ода цаг зуур көдлҗәхш. Герин эзн малын хошт көдлнә, Валентина бәәрн селәнә сурһульд бичкдүдиг биилдг дасхна.
Марһанд орлцач болһн ямр нег номинацд темдглгдв. Ергенинск селәнә күүкд күн Анҗан Мария «Хәәртә эк», Һооҗурас Санҗин Яна «Чадмг эк», Алцңһуд селәнәс Михайлина Саглр «Ээлтә эк», Көтчнрәс Эрнҗәнә Вера «Төрскнч седклтә эк» гидг номинацст ончрв. Района әмтн дууһан өгәд, «Олн-әмтнә дур авлсн мөрә» гидг номинацд бас дииләчиг йилһҗ авв, терүнд Эрнҗәнә Вера диилвр бәрв.
Көтчнрә РМО-н толһач Һооҗурин Санл күүкд улсиг сән Өдрләнь йөрәһәд, Күндллһнә һашгуд болн белгүд бәрүлҗ өгв. Района күүкд улсин хүүвин ахлач Мацга Татьяна бас күүкд улст белгүд бәрүлҗ өгәд, сән өдрин байрла йөрәв. РМО-н көдләч Кекән Светлана Алцңһуд селәнә сойлын төвин һардач Аманкан Данарад эн марһа давуллһнд дөңгән күргснднь ханлтын бичг бәрүлҗ өгв. Олн үртә экнр марһа бүрдәһәчнрт ханлтан өргҗ, эн керг-үүлдвр эднд ик омг өгсиг темдглв.
ДООҖАН Наталья

Видео