Хаслһна диг-даран дәкнәс утдулгдв

16-03-2021, 14:10 | Таңһчин зәңгс » Зіњг

Хальмг Таңһчин Толһачин зәрлгәс иштә коронавирусн гем түгх әәмшгәс көлтә хаслһна диг-даран цааранднь утдулгдв. Тиигәд мана таңһчд саглуллһна керг-үүлдврмүд мөрн сарин 11 күртл күцәгдх зөвтә. Олн-әмтн цуглрдг һазрт цугтан нег-негнәсн күсдундур метрт бәәҗ, чирәдән хааһул эрк биш олзлх зөвтә, 65 наснас ах улс болхла гертән бәәҗ гемәс саглх зөвтә гисн сүв-селвг тер кевәрн үлдв.

Хаслһна диг-даран цааранднь утдулгдсн бийнь мана таңһчд амрлһна болн байрин керг-үүлдврмүд давулдг бүрдәцс, зуульчллһна агентствс болн спортивн объектсин өөмдг бассейнмуд үүлдврән эклҗ чадхмн. Эднд Роспотребнадзорин санитарн некврмүд күцәҗ үүлдврән эклх зөв өггдв. Театрмудт болн концертн залд 75 күн күртл цуглрҗ, тәәз деер үзүлгдҗәх наадд болн концертмүд хәләҗ чадхмн. Темдглхәс, таңһчд олн әмтн цуглрдг нәр-наад, спортивн марһа, керг-төрин харһлтс, сойлын-гегәрлтин керг-үүлдврмүд давулҗ болшго. Зуг театрмудын залд тиим керг-үүлдврмүд давулҗ болҗана.
Хальмг Таңһчин ах санитарн эмч Санҗин Җаңһрин келсәр, сүл цагт коронавирусн гемәр гемтсн улсин то баһрҗана. Тогтсн бәәдл хаслһна зәрм керг-үүлдврмүдиг уурулх зөв өгчәнә. Болв бидн бәәдлиг бүрткхвидн, нег үлү үүлдврән эклҗәх бүрдәцсиг шинҗлхвидн, – гиҗ Джангар Николаевич келв.
Бачм штабин сүүрин йовудт таңһчин Толһач Хаска Бату таңһчин сурһуль-эрдмин министерствд Роспотребнадзорла хамдан бичкдүдин садмудыг секлһнд белдлһнә төриг хаһлх даалһвр өгв. Тиигәд, бүрдәцсиг хот-хоолар тетклһнә бооца батллһна, сурһмҗлачнрин эрүл-менд шинҗллһнә болн хальдврта гемәс тәрлһ келһнә, саглуллһна эв-арһс хулдҗ авлһна төрмүд хаһлх неквр тәвгдв.
Таңһчин эрүл-менд харлһна министерствин то-дигәр, сүл хонгт дәкәд 25 күүнд коронавирусн гем илдкгдв. Тиигәд, пандемий эклснәс авн мана таңһчд 19557 күн COVID-19 гемәр гемтв. Теднәснь 18675 күн эн гемәс эдгв. Ода госпитальмудт ут тоодан 453 күн эмнлһ авчана, теднәснь ик зунь Элстд бәәнә. Яшкулин болн Баһ Дөрвдә район болһнд 21 күн эмнлһ авчана. Күнд кевәр гемнь давҗах 14 күүнәс 9-нь ИВЛ-аппаратд бәәнә. Эн хальдврта гемәс иштә 306 күн сәәһән хәәв.
БАТАН Сәәхлә

Видео