Селәдин делгрлтин төлә

18-03-2021, 17:02 | Таңһчин зәңгс » Зіњг

Хальмг Таңһчд эн җил муниципальн бүрдәцсин төсвс күцәлһнд дөң күрглһнә көтлврин медлд 17 социальн төсв бәәдл-җирһлд тохрагдхмн. Эн көтлвр мана таңһчд 2019-ч җиләс авн күцәгдҗәнә, терүнә халхар таңһчин бюджетәс муниципальн бүрдәцст мөңгн йилһгднә. Хальмг Таңһчин Толһач Хаска Батун темдглсәр, һурвн җил дарандан мана таңһчд күцәгдҗәх көтлврин медлд әмтн төрскн селәнә эс гиҗ балһсна олна инфраструктур делгрүллһнд орлцҗана.

- Эн көтлвр экләд күцәгдснәс авн бидн 9 төсв дөңнҗ, таңһчин бюджетәс терүнд немр мөңг йилһсн биләвидн. Тер цагт Октябрьск, Ик Буурла, Үстин болн Яшкулин райодт социальн төсвс күцәгдсн билә. Терүнд таңһчин бюджетәс ут тоодан 5,3 сай арслң йилһгдсмн. Эн көтлвр сән йовудтаһар күцәгдҗәхиг үзәд, талдан райодын әмтн бас терүнд орлцдг болв. Тиигәд, 2020-ч җилд ирлцнгү 18 төсв күцәгдв, таңһчин бюджетәс терүнд 9,6 сай арслң йилһгдв. Муниципалитет социальн төсвд кергтә мөңг йилһсн деерән бәәрн улс, бүрдәцс, онц арһлачнр эврә сән дурар терүнд орлцхдан белн бәәхән медүлх зөвтә, эннь көтлврт орлцхин төлә һоллгч некврнь болна. Зуг эн неквр күцәгдсн цагт таңһчин бюджетәс субсидь йилһгднә. Эн мөңгн спортивн болн бичкдүдин талвңд, паркст сән таал тогталһнд, хаша-хаац тосхлһнд, санлын мемориалмуд босхлһнд олзлгдна, – гиҗ Бату Сергеевич темдглв.
2021-ч җилд эн көтлврт орлцх элчнрин дунд болсн марһана ашар 17 эрлһн шүүҗ авгдв, теднд таңһчин бюджетәс 10 сай арслң йилһгдхмн. «Таңһчин әмтн седвәрән медүлҗ, эврә тәвцән шунмһаһар орулдг болв. Муниципалитетмүдин толһачнр бәәрн әмтн дунд эн көтлврин тускар цәәлһврин көдлмш давулҗ, әмтн төрскн һазр-уснаннь болн таңһчиннь делгрлтд орлцхиг урмдулх зөвтә», – гиҗ таңһчин Толһач дәкн нег тодлулв.

БАТАН Наталья

Видео