36 өрк-бүл марһанд орлцҗана

20-03-2021, 14:54 | Таңһчин зәңгс » Зіњг

Хальмг Таңһчин социальн делгрлтин, күч-көлснә болн көдлмшәр тетклһнә министерствин зәңглсәр, «2021 җилин сән гисн өрк-бүл» гидг Цугәрәсән марһана региональн девсңд 36 өрк-бүл орлцҗана. Терүнд таңһчин района муниципальн бүрдәц болһна элчнр орлцхар эрлһән орулсн бәәнә.

Марһанд орлцачнр «Олн үртә өрк-бүл», «Баахн өрк-бүл», «Селән һазрт бәәдг өрк-бүл», «Алтн өрк-бүл» болн «Авъяс хадһлдг өрк-бүл» гидг номинацсар хоорндан марһлдхмн. Сән авъяст тохрсар, җил болһн селән һазрт бәәдг өрк-бүлмүдин номинацд орлцачнрин то ик болна. Эн җил 10 өрк-бүл хоорндан эн номинацд марһлдҗ, диилвр бәрхәр зүткхмн. «Алтн өрк-бүл» гидг номинацд 50 җилдән хамдан ни-негн бәәдг, күүкдтән болн ачнр-зеенртән чик сурһмҗ өгсн улс орлцна. Эн җил түрүн болҗ орлцачнрин то икдв. Урднь зуг хойр өрк-бүл орлцдг бәәсн болхла, эн җил 6 өрк-бүл бийиннь тускар келҗ өгхмн. Олн үртә өрк-бүлмүдин номинацд орлцҗах өнр-өсклң өрк-бүлмүдәс негнднь 5 үрн, хойртнь 6 үрн, неҗәд өрк-бүлд 7 болн 8 үрн бәәнә. Һучн тавн нас күрәд уга баахн улсин 7 өрк эн марһанд орлцҗахнь бас темдгтә. Өвкнриннь авъяс, сойл болн төрскн кел хадһлҗадг, уңг-тохминнь тууҗ меддг 8 өрк-бүл дундас бас сән гисинь йилһҗ авх кергтә болхмн. Марһана түрүн девсңгин аш моһа сарин 26-д медгдхмн.
Номинац болһнд диилвр бәрсн өрк-бүл 50 миңһн арслңгар мөрәлгдхмн. Гран-при шүүҗ авсн өрк-бүл терүн деерән 100 миңһн арслң авхмн. Тер мет марһанд орлцачнр дипломсар болн үнтә белгүдәр ачлгдхмн.
- Җил ирвәс эн марһанд орлцҗах өрк-бүлмүдин то өсәд йовхнь мадниг байрлулҗана. Хальмгин ниитә, өнр-өсклң болн билгтә өрк-бүлмүд мана орн-нутгин улсин төлә нег-негән күндллһнә болн тевчлһнә сән үлгүр болна. Мана таңһчин өрк-бүлмүд Цугәрәсән марһана дииләчнрин тоод эрк биш ордгнь ик бахмҗ үүдәнә, – гиҗ министр Өлзәтин Марина темдглв.
БАТАН Наталья

Видео